GIDIBATIHAN karon sa Kongreso ang balaudnon sa debursyo. Pipila na ka Kongreso nga nilabay apan kanunay kining natanggong tungod kay lig-on ang mga grupo nga nibabag niini, apil ang simbahang Romano Katoliko.
Ang Pilipinas ug Vatican na lang kuno ang mga nasud sa kalibutan nga walay debursyo o ang pagputol sa kasal sa magtiayon pinaagi sa balaod.
Sa mga Kristiyano, giila ang sakramento sa kasal nga gibugkos lamang sa Labaw'ng Makagagahom ug walay si bisan kinsa nga makabugto niini gawas sa kamatayon.
Dako daw ang dautang epekto sa debursyo ngadto sa mga bata. Mahimo na unyang dakong ilad, bisyo o negosyo ang debursyo kay pwede nang kasal karon, debursyo ugma aron dunay makuhang sapi.
Madunggan nato sa mga artista sa Hollywood nga tag-3 o 4 ka higayon nga nagdebursyo. Ug sa matag debursyo adunay kabtangan o sapi nga gibahin-bahin.
Sa laing bahin, ang mga nisuporta sa debursyo nagsulti nga walay "forever" nga relasyon. May magtiayon nga nagsige lang og bugno nga mora'g mga toro nga nasulod sa rodeo.
Daghang estorya ang atong nadungog nga ang babaye bugbog sarado sa iyang bana nga walay trabaho, bisyuso, palahubog, babaero apan ang babaye dili makabulag kay daghan silag mga anak.
May mga asawa nga naghilak sa daplin ug nidawat na lang sa ilang kapalaran kay wala silay kapaingan sa nahitabo kanila. Ang posible nilang mabuhat mao ang pag-file og "temporary o permanent protection order" base sa "Anti-Violence Against Women and their Childrens' Act" aron mahunong ang pagpang-abuso.
Pwede sab siyang mo-file og "legal separation" diin ang korte mao ang mosugo nga magbulag silang duha apan dili sila mahimong magminyo pa. Kung may dako nga kwarta ug wala magdali, mahimong mag-file sila og "annulment of marriage" sa husgado aron mabali-wala ang kasal o daw walay kasal nga nahitabo.
Dako og dugay nga proseso kining "annulment" kay kinahanglang ipakita sa duruha sa korte nga wala sa maayong pangisip ang usa sa panahon sa kaminyuon o kaha napugos siya sa pagpakasal.
Dunay iladong magtiayon nga atong nasayran nga niagi niini sama nila ni Sharon Cuneta ug Gabby Concepcion, Nora Aunor ug Christopher de Leon, Mayor Rody Duterte ug Elizabeth Zimmerman. Apan dili tanang nag-file sa annulment naaprubahan sama ni Dolphy aron iyang mapakaslan ang iyang dugay nang hinigugma nga si Zsa Zsa Padilla.
Tungod sa pagdaghan sa nag-file og annulment, ang simbahang Katoliko naghinay-hinay nga nagluag sa ilang palisiya kabahin niini nga mao sab ang nahitabo sa mga korte. Mao usab kini ang rason nganong giduso ang balaudnon sa debursyo sa Kongreso alang sa ikaduhang gugma.
Sa akong kabahin, lisod pang molusot ang maong balaod sa kasamtangang liderato sa Kongreso sama sa gidusong balaudnon sa Sexual Orientation, Gender Identity and Expression (SOGIE) sa grupong LGBTQ+.
Apan speaking sa ikaduhang gugma, gibugkos karong adlawa ang kasingkasing nila ni Paul Armand Javines ug Helen Cayanong, sobra 60-anyos, biyudo ug biyuda aron magsugod ang bag-ong panid sa ilang estorya sa kinabuhing minyo.
Mosunod ka ha dayon ang pagpabunyag? Congratulations ninyong duha!