NANGANDAM na ang Davao del Sur Police Provincial Office (DSPPO) alang sa pagpatuman sa "Oplan Kalag-Kalag" human gilaumang modagsa ang katawhan sa nagkadaiyang dapit aron mobisita sa mga sam-ang sa kalungsuran sa probinsiya.
Gimandoan na ni Police Colonel Alberto Lupaz, officer-in-charge sa DSPPO, ang tanang hepe sa mga kaistasyonan nga mopahigayon og mga plano alang sa pagpatuman sa hugot nga seguridad panahon sa paghandom sa mga minatay.
Aduna say imuntar nga checkpoint ang kapulisan sa kadalanan aron mahimong giya sa mga mobiyahe padung sa probinsiya.
Samtang gilauman ang pagdagsa sa mga pasahero sa mga publikong terminal mao nga aduna say mga pulis nga magbantay sa seguridad.
Dungan niini, giawhag sa kapulisan ang mga pasahero nga motabang pagpaniid sa mga bagahe sa ilang palibot ug motaho gilayon kanila kung adunay mga katingad-ang butang o lihok sa mga tawo.
Sa Oktubre 31, magsugod na pagpakatap ang DSPPO sa ilang mga sakop sa matag sementeryo ug sa mga terminal, sanglit magsugod na sab ang bulto sa mga pasahero nga mopauli sa ilang mga dapit human gitakda ang taas nga bakasyon sanglit "special non-working holiday" ang Nobyembre 1, Biyernes, kon mahitabo ang All Saints' Day samtang ang Nobyembre 2 mao All Souls' Day.
Gipahinumdoman sa kapulisan ang publiko nga bugtong kandila ug bulak lang ang dad-on sa sementeryo ug likayan ang pagsugal, pagtagay sa ilimnong makahubog ug pagdala-dala og mga mahait nga hinagiban.
Adunay mga pulis nga magbantay sa mga entradang bahin sa sementeryo aron marekisa ang mga dalang butang sa matag indibiduwal.
Nanghinaut ang kapulisan nga mohatag sa ilang kooperasyon ang publiko aron mahimong hapsay ug malinawon ang Undas 2019. (Orlando B. Dinoy)