KAPULISAN sa Central Visayas wa na makugang sa pagbiya og sayo sa katungdanan ni PNP Chief Oscar Albayalde taliwa sa kontrobersiya nga iyang giatubang.
Wa usab sila ma low morale sa kalit nga pagbiya sa ilang labaw. Atol sa flag raising ceremony sa Camp Crame, gianunsyo ni PNP Chief Police General Oscar Albayalde ang iyang pagbiya sa katungdanan nunot sa mga pasangil nga gilabay ngadto kaniya.
Wa siya mo-resign kon di, nagpahimus siya sa terminal leave.
Gipasanginlan si Albayalde nga adunay kalambigitan sa palit bato sa mga ninja cops sa probinsya sa Pampanga niadtong 2013 sa dihang siya pa ang provincial director sa lalawigan.
Si Albayalde moretiro na unta sa Nobiyembre 8 ning tuiga apan wa na niya kini huwata, iya nang giduso ang iyang resignation sa secretary sa Department of Interior and Local Government aron mopahimus sa non-duty status kun terminal leave.
Gibati nagsagol
Matod ni Cebu City Police Director Colonel Gemma Vinluan nga maisugon ang desisyon ni Albayalde ug iya kining gidayeg.
‘Itong ginawa ni Chief PNP (Albayalde), itoy isang senyales na open siya for investigation. Mahirap naman magbigay tayo ng sariling opinion dahil hindi naman ito makakatulong sa kaso. Kung ano ang maging findings sa national headquarters regarding sa mga accusations let it be. Pero yung gesture ng pag re-resign as Chief PNP, isang magandang gesture,”matod ni Vinluan.
Bisan sa nagpadayon nga imbestigasyon sa Senado labot sa giingong pagkalambigit ni Albayalde sa ninja cops sa Pampanga, gihulagway ni Vinluan nga wa matarog ang kapulisan sa Siyudad sa Sugbo.
Apan si Police Colonel Ildebrandi Usana, kasamtangan nga Deputy Regional Director For Administration ug Officer In Charge sa Police Regional Office 7, niangkon nga nakurat siya sa kalit nga pagkanaog ni Albayalde.
Nagtuo siya nga sa Oktobre 29 pa ang turn-over sa bag-ong mapili ni President Rodrigo Duterte nga sunod PNP chief.
“Initially po ay medyo may kunting surprise kasi inaasahan naming na October 29 yung turnover po. Pero we give it to the Chief PNP, siya naman po ay binigyan ng pansin nga SILG and I guess one thing, let to our OIC, now si General (Archie) Gamboa po, nerespeto namin ang kanyang desisyon,” matod ni Usana.
Niasumer sa pwesto ni Albayalde si Police Lt. General Archie Francisco Gamboa. Gipasalig ni Usana nga wa maapektohi ang trabaho sa mga pulis.
Sinas moasumer
Ugma na hingpit nga molingkod isip hepe sa National Capital Region Police Office si Police Brigadier General Debold Sinas hulip ni Police Major General Guillermo Eleazar nga nahimo nang chief of directorial Staff sa Camp Crame.
Dala ni Sinas ang pipila ka mga PNP personnel sa Police Regional Office 7 sama sa tanang mga sakop sa Regional Special Operations Group 7 ug pipila ka mga personnel sa Regional Intelligence Division 7.
Usa sa kasaligang tinubdan sa sulod sa Police Regional Office 7 nga di magpahingan nagkanayon nga didto sila ibutang sa RSOG NCRPO diin ang ilang trabaho mao ang pag-abag sa gubat batok sa illegal nga drugas ni Sinas. Nagpaabot na lang sila sa mohulip sa ilang biyaan nga pwesto.
Usa sa mga saad ni General Sinas mao ang pagdala sa NCRPO sa Oplan Sauron diin nakatutok kini sa anti drug ug anti criminality operations.
Lakip sa giingong gidala sa kanhi PRO-7 Director ang bandang Voltes V nga maoy molingaw sa mga tawo sa usa ka lugar kon adunay kalihukan ang PRO 7.
Samtang si Police Major Orlando Carag gipahulipan na usab sa katungdanan isip hepe sa Talisay City police station aron mo kuyog kang Sinas.
Sa Lunes sa hapon, Oktubre 14, gipahigayon ang turnover of command sa kapulisan sa siyudad sa Talisay.
Ang nihulip kaniya si Police Major Gerard Pelare.
“Wala pa akong position sa NCRPO. Pero ang sabi ni General Sinas, tutulong muna ako sa office niya,”matod ni Carag.
Si Carag ang aide de camp ni Sinas sa dihang bag-o pa siya nadestino sa PRO 7 apan gihatagan og higayon nga mahimong chief of police sa Siyudad sa Talisay. Si Pelare, sa iyang bahin, nitug-an nga usa sa iyang patutukan ang problema sa illegal nga drugas ug susihon pa kon unsa pay palambuon. (Dugang taho ni BBT)