SUPERBALITA CEBU

DILG way klaro: Gobernador sa assessment

GOBERNADOR Gwendolyn Garcia wa makauyon sa gipakitang assessment sa Department of Interior and Local Government (DILG) sa pito ka mga lungsod sa probinsya sa Sugbo nga giingong wa makaatuman sa mando ni Presidente Rodrigo Duterte sa paghinlo sa kadalanan.

Matod ni Garcia nga wa magkatumong ang assessment sa DILG dinhi sa rehiyon ug sa kaulohan human nagtungtong lang sa medium completion rate ang gigrado sa DILG sa Sugbo bisan kon migrado na si Undersecretaty Epimaco Densing III og excellent completion sa clearing operation sa Syudad sa Sugbo.

“Wa lagi klaro. Kon naay miscommunication, it’s the responsibility of the DILG to make things clear, the parameters should be clearly set, the expectation should be clearly set and they have all the time to monitor. Unya nganong September 30 na man sila mo-warning”, matod ni Garcia.

Lakip na usab sa uban pang lungsod nga giingong nakahawan na sa kadalanan apan gigradohan gihapon og hagbong sa DILG, sama sa Siyudad sa Carcar ug mga lungsod sa Badian, Carmen, Compostela, Ginatilan, Moalboal ug Pinamungajan.

“Usec. (Epimaco) Densing had explained the purpose of his visit vis-a-vis the task of the validation team and I think there is no need to further explain it,” matod sa tigpamaba sa DILG 7 Michael Braga kabahin sa komento ni Garcia nga gikwestiyon ang resulta sa assessment.

“There is a proper venue to question or react to the results, and we believe the LGUs already know that,” dugang niya.

Wa makadayeg

Matod ni Garcia nga wa siya mobilib sa gibuhat nga revalidation sa DILG sanglit wa kini mopahibaw sa mga mayor kon asa ang angay tutukan paghinlo una mihatag ug grado.

“Wa ko mobilib ana ilang rating. If they really wanted also to help, they could’ve already forewarned the chief executives nga kini please focus here, kuhaa ni inani, ana,” matod ni Garcia.

Pasabta mi: DILG

Mga local government units (LGUs) nga wala makatuman sa lagda ni Presidente Rodrigo Duterte kabahin sa road clearing, padalhan og show cause order sa DILG.

Samtang aduna’y laing validation karong Disyembre alang sa road clearing efforts.

Matod ni DILG 7 Regional Director Leocadio Trovela nga naghuwat nalang sila sa show cause order gikan sa ilang ulohang buhatan aron itunol kini sa 12 ka mga LGUs sa Central Visayas nga wa makatuman sa Memorandum Circular 2019-121 ni Duterte kabahin sa road clearing.

Dugang ni Trovela nga bisan kon aduna’y LGUs nga wala makatuman sa Central Visayas, apan anaa sa 91% ang compliance sa Central Visayas. (ANV & HBL)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph