DI MAAYONG magmaneho nga nagduka kay dako ang kahigayunan nga maaksidente.
Sama aning nahitabo sa usa ka lalakeng trabahante nga nagmotorsiklo padung motrabaho nga naigo sa awto nga niambak sa center island sa Cebu South Coastal Road (CSCR) padung sa pikas nga lane sa Barangay San Roque, Dakbayan sa Talisay.
Gituohan sa kapulisan nga ang drayber sa awto nakatug samtang nagmaneho.
Dead on the spot si Marjun Paragoso, 27, taga Barangay Inayagan, Siyudad sa Naga, tungod sa kakusog sa impact sa bangga.
Nasuta nga si Paragoso nakaangkon og mga bali sa kabukugan ug dakong kadaut sa ulo tungod sa iyang pagkalagpot atol sa aksidente alas 6:20 Lunes sa buntag, Oktubre 14.
Ang nibangga puti nga awto nga gimaneho ni Kurt Joseph Año, 26, taga Fairview Village, Barangay Lawaan 1, Siyudad sa Talisay.
Si Patrolman Ricky Abarquez sa Talisay City Traffic Division nitug-an nga gikan sa balay sa iyang uyab nga taga Siyudad sa Sugbo si Año ug padung na mopauli.
Samtang si Paragoso padung sa Siyudad sa Sugbo aron motrabaho.
Sa pakisusi, matod ni Police Patrolman Eufenio Padillos Jr, sa Lawaan 1 community police station, nga usa sa ilang gitan-aw nga posibleng nakatulog si Año samtang nagmaneho ug kusog ang padagan.
“Gipangutana nato siya, wala na man siyay mahinumduman daw ngano naingon ato. Usa sa ato gitan-aw nga basin nakatug ni siya,” saysay ni Padillos sa Superbalita Cebu.
Sa dihang niambak ang awto ni Año sa center island, nisubay kini sa lane nga giagian ni Paragoso, niigo ngadto sa biktima. Tungod sa grabeng impact, nakabsan dayon sa kinabuhi si Paragoso.
Si Año luwas ra apan dako og kadaut ang iyang sakyanan.
Tambag sa kapulisan sa mga magmaneho og bisan unsa nga sakyanan nga seguruon nga kondisyon ang lawas, lakip na ang sakyanan aron di madisgrasya ug makaangin pa og ubang kinabuhi.
Si Año gitanggong sa Talisay detention cell, samtang nagpaabot sa pamilya sa biktima nga mopasaka og kasong reckless imprudence resulting in homicide and damage to property.