SUPERBALITA CEBU

Ex-Cesafi player awardee sa PVL

BEST BLOCKER: Ang Sugboanong si Lorene Grace Toring nga mapasigarbuhon kaayong mipakita sa iyang unang award isip rookie player sa Adamson University sa bag-o lang natapos nga Premier Volleyball League Collegiate Conference sa Manila. Siya ang nahimong sa best middle blocker awardee sa competition. (Tampo)

BISAN pa man sa iyang unang tuig sa pagtak-ang sa dakong lega didto sa Kaulohan, gipakita sa Sugboanong balibolista nga si Lorene Grace Toring ang iyang kalantip ug kahanas sa bag-o lang natapos nga Premier Volleyball League (PVL) Collegiate Conference Season 3 championships.

Ang 18-anyos nga kanhi sakop sa Southwestern University (SWU) maoy usa sa mga nakahagpat og individual awards niadtong Sabado sa dihang gibuntog sa Adamson Lady Falcons ang Santo Tomas Golden Tigresses, 25-19, 25-6, 25-17 sa Game 2 sa ilang best-of-three series sa Filoil Flying V Center sa San Juan.

Si Lorene Grace, anak sa kanhi ug inilang basketball player sa Sugbo nga si Rene Toring, maoy napiling Best Middle Blocker sa tournament nga nagsilbing pre-season sa UAAP.

“Proud kaayo mi as parents. Wa gud mi mag-expect nga maka-award siya kay rookie pa gud. Pero nakita gyud namo nga naa siyay potential,”matod ni Rene kon Rentors ngadto sa iyang mga higala.

Si Lorene nakaduwa og usa ka tuig sa Cebu Schools Athletic Foundation, Inc. (Cesafi) sa high school division, ubos sa SWU-Phinma Cobras sa wala pa kini motapon didto sa Kaulohan.

Nakapakita usab siya og aksiyon sa Palarong Pambansa.

“Actually, daghan man gustong mokuha niya sa Manila. In fact, didto na siya sa UP (University of the Philippines) pero akong gibalhin kay nausab man ang privelege sa bata nga ilang gi-offer diri namo. Ang FEU, Perpetual ug UST nanawag sab,” dugang saysay sa amahan nga kanhi sakop sa UV Lancers.

Sa edad nga 18-anyos, si Lorene Grace aduna nay gitas-on nga 6-1 ug gituohan nga motubo pa.

Nagsugod ang kahilig niini sa volleyball dihang nagtungha pa kini sa elementarya sa St. Mary’s Academy sa San Nicholas.

“Dunay nakabantay nga morag dunay potensiyal ba, mao to nga gi-recruit sa SWU. So amo lang sab nga gyud nga suportaran,” ni Rene pa.

Ang ubang nakadawat og individual awards mao sila si Trisha Genesis (Adamson) kinsa maoy most valuable player ug Best Open Spiker, Faith Nisperos (Ateneo)-second Best Open Spiker, Imee Hernandez (UST)-second Best Middle Blocker, Klarisa Abriam (Benilde)-Best Opposite Spiker, Jaja Maraguinot (Ateneo)-Best Setter, ug Arianne Daguil (Benilde)-Best Libero. (JBM)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph