Todino: Pagbasa sa Bibliya sa mga tunghaan

KINSA bay mosupak aning giduso nga balaodnon ni Kongresista Benny Abante Jr., House minority leader, nga himuong mandatory kining pagbasa og Bibliya sa mga tunghaang publiko sa elementarya ug high school.

Sa ubang Christian school, kon eskwelahan nga gidumala sa simbahan naa gyud kining subject kabahin sa Bibliya. Gani, duna sab silay worship hour diin ang mga estudyanti moadto sa simbahan o chapel aron magsimba.

Tinuod, dako og ikatabang kining pagbasa sa Bibliya diha sa pagtubo sa tawo aron mahimong dalaygon sa komunidad.

Matod sa Salmo 119:105 “Ang imong pulong sama sa suga nga nagahatag ug kahayag sa akong agianan.”

Daghang pagtulon-an makuha nato gikan sa pulong sa Dios nga mao ang Bibliya. Maggiya kanato sa pagkinabuhi nga matarong.

Apan, atong timan-an kining pulong sa Dios usa kini ka espirituhanon nga butang ug lisod sabton sa yano ug maalamon nga tawo hangtod nga dili siya magbaton sa balaang espiritu.

Busa, sa dili pa mobasa og Bibliya gikinahanglan gyud nga dapiton nato ang balaang espiruto aron mogiya sa atong pagsabot sa pulong sa Dios.

Kay bisan pa og abogado ka, maglisod ka og sabot sa pulong sa Dios kon magdependi ka sa imong kaalam.

Kon molampos si Abante sa iyang tinguha, mas maayo tingli nga gawas sa pagbasa sa Bibliya, gipasantop nato ang mga punto nganong kinahanglan gyud ang pagbasa sa maong Bibliya ug unsaon niini pagsabot.

Una sa tanan, konbinsihon gyud unta ni Abante ang Kongreso nga mohatag og higayon nga magbasa sa Bibliya sa dili pa magsugod sa ilang panagtigum.

Unsaon pagsalig sa eskweslahan kon mismo ang nagpalusot sa maong balaod wa man gani mohatag og higayon pagtuon sa pulong sa Dios.

Karong panahona haom kaayo kining laraw ni Abante ug hinaut dili lang unta sa mga tunghaan, himoon sab kini sa panimay, opisina labi na gyud sa mga buhatan sa gobiyerno.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph