GIHAGIT ni Misamis Oriental Governor Bambi Emano si Board Member Jeric Khu nga iyang ihatag ang katungod pag-manage sa Capitol Park sa probinsya.
Kini, human si Board Member Khu nikwestyon sa gobernador nganong hangtod karong panahona wala pa gibuksan sa publiko ang parke.
Gisirad-an kini niadtong bulan sa Hulyo human nagtukod og mga balay ang mga bakwit gikan sa Lagonglong atol sa ilang pagpuyo sa Capitol Park tuig na kapin.
Giingon sab ni Khu nga bikil alang kaniya ang pag-walking sa Capitol Park.
Gipasabot ni Emano nga ang rekomendasyon sa kapolisan sa probinsya maoy iyang gipaabot nga mabuksan kini og balik, apan gisulti sa kapolisan nga abrihan lamang kini kung mabutangan og mga paril ang entrance ug mga exit nga bahin sa parke.
"One of the board member niingon sige daw siya og walking sa Capitol Park. Nakaingon ko sukad-sukad sa akong pagkagobernador dinhi kauban pa kami kaniadto, wala ko sukad nakakita nga nag-walking siya ani nga parke. Ug karon iyang giangkon nga nag-walking kuno siya para lang gyod magamit niya nga rason," matud ni Emano kagahapon atol sa pagpakayab sa nasudnong bandila.
Gihagit ni Emano si Khu nga mao nay mag-manage sa parke.
"Pero kung gusto gyod niya, kay mobaklay man siya diri, ang akoa nga ihatag sa iyaha ang management sa parke. Dili nako manginlabot. Siya na ang i-incharge sa atong parke karon. I am giving him the authority. Sige, gusto man kaha nimong buksan. Sige, ibuksi. Ikaw moabri, ikaw mosira. Kinsay mosulod, kinsay mogamit," matud ni Emano.
Si Khu, human nadungog ang hagit ni Emano, wala nibalibad niini.
"Dako akong kalipay nga iyang gihatagan og pagtagad kabahin sa Dela Park nga simbolo sa kahayag sa atong lalawigan. Apan, sa iyang pulong nga ihatag kanako ang dili ko kana balibaran," matud ni Khu kinsa nihatag og pagsaway nga hugaw ug daghan basura ang dela Park tungod sa giingong anaa na sa gawas ang mga mamaligyaay ug mga manikurista.
Daw nagbalandra ang dako nga tarpulin isip 1st Runner-up sa Best Tourism Oriented Province, apan giingon niining ngitngit ang kapitolyo ug wala nagsimbolo niini.
"Dili ko balibaran ang akong hangyo para masilbihan ang katawhan, apan mas maayo siguro ang board member ang mag abri. Ang gobernador maoy mosira sa gabii aron makita niya ang kangitngit sa gabii sa dela Park," matud ni Khu atol sa sesyon sa Sangguniang Panlalawigan.
Si Bise Gobernador Jigjag Pelaez nipaabot nga kung seryoso si Emano, magpadala kini og executive order ngadto kang Khu pinaagi sa buhatan sa Sangguniang Panlalawigan aron pormal kini nga madawat.