MAKADAGHAN na nga higayon nga giingong gilugos sa 56-anyos ang 12-anyos nga bata sa Barangay Bulua, ning siyudad sa Cagayan de Oro.
Mitahan sa kapulisan si Domingo (bansagon gipugngan), usa ka construction worker, human kini nagtago-tago dihang nabulgar ang hitabo.
Ang biktima apo sa kaipon ni Domingo.
Nidangop sa buhatan sa kapulisan ang 12-anyos niadtong Oktubre 10 ug gireklamo ang kaipon sa apohan tungod sa pagpanamastamas kaniya.
Sa pakighinabi sa Superbalita kang Domingo giingong human sa pagtago-tago sulod sa usa ka semana, naka hunahuna kini nga motahan sa tungod kay giangkon ang sayop nga gihimo ug giingong dili kini mahimutang.
Aminado kini nga makadaghan nga higayon nga iyang gihilabtan ang pribadong parte sa bata.
"Ang akong kaso nga rape kanang wala man nako nakuha. F****r lang ba. Mao raman gihapon na," matud ni Domingo.
"Pagtrabaho nako sa Alae, upat ka beses didto sa sila nihigda akong ka live-in ug iyang apo. Unya didto nagsugod akong gibuhat. Murag sa Alae ka-upat. Sa Bulua kalima," dugang pa.
Gidugang pa niini nga dili usab kini mabantayan sa iyang kaipon tungod kay gatrabaho man usab kini isip manikyurista.
Giangkon niini nga nabalaka siya sa iyang kahimtang dihang nagtago-tago ug dili makampante samtang galakaw sa dalan, ug gani nakahunahuna na siya nga magpakamatay sa ikaduhang higayon.
Nangayo usab kini og pasaylo sa iyang nahimo nga dakong sayop.
"Pasayloa lang gyud ko kay nabuhat nako tong butanga tungod sa kahubog. Maong ni-surrender ko kay giamin nako tanan nakong sala. Dawaton nako ang tanan," dugang pa.
Ang suspek anaa na sa Bulua Police Station alang sa tukmang kaso nga ipasaka.