GIDUNGGAB patay ang usa ka Barangay Health Worker sulod sa iyang panimay sa Pangdan, dakbayan sa Naga, pasado alas 12 Martes sa kaadlawon, Oktubre 15, 2019.
Ang biktima giila nga si Rosario Canda, 53 anyos, ug molopyo sa Sitio Isabela, Barangay Pangdan sa dakbayan sa Naga.
Matod ni Police Staff Sergeant Ariel Yap, ang imbestigador sa Naga City Police Station, nga nakaangkon ug mga samad dinunggaban sa lawas ang biktima nga maoy hinungdan sa iyang hinanali nga kamatayon.
Adunay usa nga naka saksi nga mitug-an sa kapulisan nga pasado alas 12 gahapon sa kaadlawon naay lalake nga luwan sa motor ang naabot sa balay sa biktima.
Giingong siya ra ang nagpuyo sa iyang balay sanglit ang bana naa sa siyudad sa Sugbo nagtrabaho isip construction worker.
Natingala nalang sila nianang pagka-buntag nga wala na maka-abli sa iyang balay si Canda ug sa dihang gisusi kini sa iyang igsuon nga opisyal sa barangay na diskobrehan ang patayng lawas niini nga nagkadugo na ug giingong wala nay underwear.
Dali sila nga nanawag sa nga police sa siyudad sa Naga aron mapaubos sa imbestigasyon ang insidente.
Gitug-an ni Yap nga ilang ipaubos sa imbestigasyon ang lalake nga gika text niini sa wala pa nahitabo ang insidente.
Sigun sa ilang nabasahan sa cellular phone adunay gustong makig kita niini apan wala lang una mohatag sa detalye ang imbestigador.
“Base sa na recover namo nga cellphone naay mga conversation didto pero dili pami maka conclude nga mao gyud toy mga suspek ba, ingun didto nga mag kita sila murag naa siyay uyab base sa text sa cellphone,” matod ni Yap.
Gisalikway usab nila ang posibilidad nga gitulis ang biktima tungod kay matod sa bana niini nga P50.00 lang ang gibilin niini nga kwarta niadtong Lunes, Oktubre 14.
Aktibo usab ang biktima sa barangay, ilabi na sa kampanya batok sa ilegal nga drugas diin siya ang moproseso sa pagpa-surrender sa mga batan-on nga tig gamitan sa illegal nga drugas.
Wala usab nila wad-a ang ubang posibilidad nga mahimong hinungdan nga gipatay ang biktima. (Superbalita Cebu)