GAMITON na sa NLEX Road Warriors ang bag-o nilang import nga si Manny Harris sa ilang pagpakigbatok sa Columbian Dyip sa premirong duwa karong hapon sa Philippine Basketball Association (PBA) Governor’s Cup sa Ynares Center sa Antipolo City.
Kon buot hunahunaon, maayo ra ang dagan sa Road Warriors kauban ang kanhi nila import nga si Olu Ashaolu diin nakarehistro sila og 4-1 nga rekord.
Apan gumikan kay dili kaayo tantong impresibo ang gipakita ni Ashaolu, nakadesisyon ang Road Warriors nga mokuha og bag-ong import nga sa ilang tan-aw mas ilang gikinahanglan aron mas palig-unon pa ang ilang kampanya.
Si Harris usa ka kanhi magduduwa sa National Basketball Association (NBA).
Naila si Harris nga usa ka makapaukyab nga mamuntosay dihang nagduwa pa kini sa Michigan sa college basketball.
Ang 30 anyos nga basketbolista nakapakita og aksyon ubos sa kampo sa Cleveland Cavaliers, LA Lakers ug Dallas Mavericks.
Malaumon ang Road Warriors nga sa pagpangulo ni Harris, mas mohayag pa ang ilang poruhan nga makasulod sa top four human sa elimination round diin nagtangag niini ang twice-to-beat nga bintaha.
Ang kadaugan karon sa Road Warriors makatukmod kanila sa solong ikaduhang puwesto. Sa ilang bahin, ang Dyip nagtinguha nga makalusot sila sa eliminasyon sa labing unang higayon ubos sa paggiya ni coach Johnedel Cardel.
Kasamtangang naggunit og 3-2 nga rekord ang Dyip, nga hinayhinay na sab nakakuha og respeto gikan sa ilang mga kaatbang.
Mismong si Road Warriors coach Yeng Guiao miangkon nga aduna siya’y kabalaka sa pagpakigbatok sa Dyip, nga iyang gihulagway nga delikado nga ikaatbang.
Nabalaka sab si Guiao nga posibleng dili dayon masinati ni Harris ang iyang sestima. Si Harris niadto lang Sabado niabot sa nasod.
“Siyempre, bago at hindi pa sanay dito sa PBA style of play kaya p’wedeng maging disadvantage sa kanila iyon,” matod ni Cardel.
Sa main game, magsangka ang Magnolia Ang Pambansang Manok Hotshots batok Blackwater Elite. Ang Hotshots adunay 3-2 nga rekord samtang ang Elite naggunit og 1-3 nga baraha. (ESL)