NATANGTANGAN og kulba ang Los Angeles Lakers human migawas ang resulta sa MRI ug nasuta nga dili seryuso ang pagkaangol sa tuong kumagko sa kamot sa ilang bag-ong pambato nga si Anthony Davis.
Sa taho sa ESPN, nasayran nga igo lang nalisa ang kumagko ni Davis.
Nasinati ni Davis ang angol atol sa duwa sa laing kapildihan nga naangkon sa Lakers batok sa Brooklyn Nets, 77-91, sa National Basketball Association (NBA) pre-season niadtong Sabado sa China.
Sulod sa tulo ka mga duwa sa pre-season, ang All-Star center nag-average og 14.7 puntos, ug 5.0 rebounds.
Dili una moduwa si Davis sa sunod nga tahas sa Lakers aron magpaalim sa iyang angol.
Gilaumang makapakita ra og aksyon si Davis sa labing unang duwa sa Lakers sa regular season karong Oktubre 22 batok sa Los Angeles Clippers. (AP, ESL)