MGA duwa:
Oktubre 18, Biyernes
7:30 pm. - 1990 Titans (3) vs. Warriors 1982 (6)
(Seniors Division)
9:00 pm. - 1985 Legends (4) vs. 1987 Bros (5)
(Seniors Division)
Oktubre 19, Sabado
6:00 pm- (D1) 1996 (3) vs 1993 (6)
7:30 pm- (D2) 2002B (3) vs 2000 (6)
9:00 pm- (D3) 2008 (3) vs 2009 (6)
Hugot nga kombati ang gipaabot nga masaksihan karong Biyernes sa dihang mosugod na ang quarterfinals round sa University of San Carlos-North Alumni Basketball Club - Cebu City Mayor’s Cup sa USC Boys High Gym sa General Maxilum Avenue, dakbayan sa Sugbo.
Sa Seniors Division, ang 1990 Titans nga naglingkod sa ikatulo nga puwesto nga may 4-2 nga baraha makigsangka sa no. 6 team nga mao ang 1982 Golden State Warriors (1-5) alang sa knockout match nga sugdan sa alas 7:30 ang takna.
Sa laing quarterfinals game, ang 1985 Legends nga maoy no. 4 human sa elimination series nga may 3-3 nga baraha makigtinaktakay usab sa 1987 Bros sa main match sa alas 9 sa gabii.
Ubos sa format, ang top two teams human sa elimination series awtomatikong mo-qualify sa semifinals round samtang ang nagsunod nga upat ka mga teams ang magtigi sa quarterfinals round.
Hinuon, ang Titans ug ang Legends isip no. 3 ug no. 4 teams maoy makaangkon sa twice-to-beat advantage batok sa no. 6 ug no. 5 squad.
Ang 1986 Siargao Wave Riders (6-0) ug ang 1988 Barako (5-1)nga maoy nag-akupar sa una ug ikaduhang luna maoy otomatikpng nakaangkon og puwesto sa semifinals round.
Ang 1991 Tigers nga wa makatilaw og kadaugan maoy bugtong team nga natagak sa maong division.
Sa Sabado, Oktubre 19, ipahigayon usab ang quarterfinals round sa laing tulo ka division.
Sa Division I, ang no. 3 team nga mao ang 1996 Chubbies (5-2) mosakbang sa no. 6 nga 1993 Dragons (3-4) sa alas 6 sa gabii, samtamg sa Division II magkombati usab ang twice-to-beat nga 2000B Goats (5-2) ug 2000 Millenium Bugs (2-5).
Magtigi usab ang 2008 Fly Boys ug ang 2009 Legacy sa Division III quarterfinals. Ang duha pulos nagtangag og 2-3 nga baraha, apan pinaagi sa winner over the other rule, ang Fly Boys maoy nakakuha sa twice-to-beat advantage.
Ang top two teams sa matag division nga nakasiguro na og luna sa semifinals round sa ilang tagsatagsa ka kategoriya mao ang 1997 Ronins, 1999 Ninety Niners sa Division I, 2001A Shipmen, 2003 Stallions sa Division II ug ingon man ang 2011 Sharks ug 2013 Districts.
Kon dunay Game 2 sa quarterfinal series, kini ipahigayon sa Dominggo, Oktubre 20. (JBM)