WALA nay sulod ang imong ATM,” masulob-on niining pulong dayong sira sa bentana.Maoy nagputol sa kaganiha rang pagtutok ni Edsel ngadto sa mga larag nga dahon sa bagon nga hambilika nga nangumpayot sa ‘firewall’ nilang Trisha. Tagsa-tagsa kining nangatagak dihang mihuros ang makusog nga hangin.Ambot nganong aduna may nagsingabot nga bagyo nga ‘summer’ o ting-init na man unta ang panahon? Mao tingali ni gitawag nga ‘climate change.’
“Hain diay si KJ?” pangutana niya. Si KJ ilang bugtong anak kinsa sama kaniya malalangon usab. Ugaling lang kay managlahi ang ilang gikahiligan.Usa ka magsusulat si Edsel samtang may gugma sa ‘painting’ si KJ. Kapila na niya kini pasabta sa kalisod sa panguwarta sa gisudlan niining arte.
“Hain kahay maayo kon panulat ang imong mansuhon, Dong?” sugyot niya sa anak.
Mitangdo kini, apan milabay na lang ang usa ka tuig wala gyud kini mosulayg panulat. Nakapangagho si Edsel. Kon nituman pa unta si KJ sa iyang sugyot dili unta maingon sila kapit-os karon.Wala gyud kini patuo bisan kapila na niya e-discourage nga ang mao niyang hilig labihan ang pagka tungason. labi na karong panahuna nga ang kompyuter mao nay miilog sa maong matang sa arte sa pagpintal.
“Dili na man sab mobasag mga magasin o mantalaan ang mga millenial “ matod ni KJ ngadto kang Edsel. “Maong mahulog sab nga dili na makadulot sa kasingkasing sa henerasyon karon, busa maingon tang way pulos ang obra sa pagsulat tungod kay mga gadget na may gikahiligan namo karon”.
Sa iyang paminaw adunay punto ang iyang anak, apan kinahanglan unta siyang adunay kaabag aron makakitag sapi pinaagi sa panulat nga maoy gibuhi niya kanila. Ug mas gikinahanglan unta niya karon nga gitakbuyan siyag sakit, nga tingali tungod sa kanunay niyang pamulaw aron makatagik og mga sugilanon, balak, gumalaysay ug uban pang matang sa panulat, iyawat na lang makasapi.
Gusto niyang basulon ang anak, ilabi na karong gipigis sila sa kalisod ug dili na siya makaumoy tungod kay migrabe ang iyang balatian. Wala na man gani siya makatumar og tambal nga pinalit sa silingang tindahan kay wala man siya makapahiling og doktor tungod sa kawad-on. Morag bukog ug panit na lang si Edsel, ug usahay halos mabugtoan siya sa ginhawa kanang atakihon siya sa hutoy.
“Inig katagak sa katapusang dahon nianang hambilika, tingali mahakuyog ako nga motipon ngadto sa yuta!” Monas ginhawa nga nalitok kini ni Edsel.
“Ayawg sultig ingon ana!’ mabalak-on ug masulub-ong pulong ni Trisha. ”Mao nay resulta sa kanunay nimong tutok niadtong mga dahon.Timan-i nga ang balak layo ra sa reyalidad.”
“Ablihi ang bentana kay gusto kong sud-ungon ang iyang pagkatagak.”
“Ay di lagi mahimo kay mosalibo ang ulan!”
Sayong nahigmata si Edsel pagka ugma.Wala siya masayod kon angay ba siyang malipay apan daw milagro nga nahuwasan siya sa tanan niyang gipamati. Dali siyang mitimbakuwas aron buksan ang bentana. Sa iyang banabana nahurot ang mga dahon og katagak sanglit kagabii mi-land fall man ang bagyo. Apan gisugat ang iyang panan-aw niadtong nagbinugtong nga dahon sa hambilika didto sa nahimutangan niini. Dako ang iyang kahibulong nga mibalik kinig kalunhaw. Nakapangutana siya sa kaugalingon kon mao bay tilimad-on sa pagkawala og kalit sa iyang sakit..Daw wala siya makaagi og grabeng sakit.
Daling migawas sa balay si Edsel. Maoy gipuntariya sa iyang mga lakang ang nahimutangan sa bagon. Ug nahiigking si Trisha pagkadungog sa katawa ni Edsel. Maoy nakita ni Edsel ang nahibilin nga pintal nga ‘green’ ug ‘yellow’ samtang gisandig sa ‘firewall’ ang usa ka hagdanan nga kawayan.
“Nakamugna na gyug obra maestra ang atong anak!” singgit niya ngadto sa iyang asawa kinsa halos di makatuo sa iyang pagkaayo.
(KATAPUSAN)