UTANG ang giingong nagtukmod sa usa ka lalaki nga nisulay pagkawat og sakyanan niadtong Oktubre 14 mga ala 1:35 sa hapon sa South Field, Villa Trinitas, Barangay Bugo, siyudad sa Cagayan de Oro.
Sikop si Louje Lozada, 32, ulitawo, residente sa Phase 2, Villa Trinitas Bugo, siyudad sa Cagayan de Oro.
Sa nahipos nga impormasiyon gikan sa Cagayan de Oro Police Office (Cocpo), gikabutyag nga samtang nakaparada ang usa ka Isuzu Crosswind nga nagdala og numero sa plaka nga Xlk331 sa South Field, Villa Trinitas, Bugo, gisakyan kini sa suspek.
Sa gihimo nga operasyon sa kapulisan, gisulayan sa pagpahunong ang sakyanan tungod sa ilang buhatan apan nagpadayon kini sa pagpadagan.
Gibangga usab sa suspek ang sakyanan sa usa ka kural sa panimalay ug nidagan kini, kinsa nag-ilis pa og sapot apan nakorner kini sa Sambuwalan, Agusan, sa siyudad.
Gibutyag ni Lozada nga wala siyay plano nga dad-on ang sakyanan kundili ang paglimas lamang sa mga gamit sa sulod.
Samtang gisaysay ni Lozada nga nakahunahuna siya og dautan tungod sa kadaghan sa problema labina nga nakagamit kini og kwarta sa gitrabahoan.
Nakuha gikan sa suspek ang usa ka Smith and Wesson nga. 38 kalibre nga pistola nga dunay tulo ka mga buhing bala lakip na lima ka pakete sa gitoohang shabu.
Gipanghimakak sa suspek ang mga ilegal nga druga lakip na ang pistola.
Ang suspetsado ang nagtingkagol na sa bilanggoan karong panahona ug posibleng pasakaan og kasong carnapping, ug kalapasan sa Republic Act 9165 kon illegal drugs ug illegal possession of firearms.