GIKAALARMA na sa konseho ang giingong nagkataas nga kaso sa paghikog dinhi sa siyudad sa Cagayan de Oro.
Atol sa sesyon sa 19th City Council, nagpadayag og special report si Konsehal Jocelyn "Bebot" Rodriguez kalabot na sa kasong hikog sa siyudad tungod sa depresiyon.
Gibutyag ni Rodriguez nga naalarma na kini sa nagkataas nga ihap sa kasong hikog sa siyudad.
Sa gipakitang datos niini gikan sa Philippine Mental Health Association Inc., makita nga anaa na sa 24 ka mga insidente sa pagpakamatay ang natala sa siyudad gikan sa bulan sa Enero hangtod bulan sa Septiyembre.
"Cagayan de Oro mental health condition is one of our serious problems especially to our young people," matud ni Rodriguez.
Gidugang pa niini nga angayang ang konseho makigbatok niini pinaagi sa pagmugna og ordinansa nga maoy magtutok niini ilabi na sa paghatag og dugang mga mental health services, pagbutang og mga pasilidad ug uban pa alang sa mga naghambing niini o sa tawo nga dunay mental illness.
Sa maong datos, anaa usab sa usa sa upat nga naghikog ang nag-edad og 18 paubos, samtang 33 porsinto ang nag-edad og 20 ngadto sa 29 ug 21 porsinto ang nag-edad og 30 ngadto 39.
Giingong sa tuig 2019, anaa sa 3.2 ang sa national, apan sa siyudad, giingong nisobra kini ngadto sa 3.6 porsinto.
Hatagan og panahon ang mga anak
Samtang nisuporta usab si Konsehal Edna Dahino sa maong sugyot nga kinahanglan na nga dunay interbensyon kalabot na niini.
"I strongly support with this proposal knowing that this is very serious problem," matud ni Dahino.
Gidugang pa niini nga daghan gyud ang mga butang nga angayang ikonsidera sama nalang dinhi sa siyudad nga mga anaa lang sa duha ka mga psychiatrist.
Buot niini nga panghingusgan ang giduso nga paghatag og iskolar sa siyudad alang sa mga psychologist ug psychiatrist.
Gipahimangnoan usab niini ang mga ginikanan nga hatagan og panahon ug angayang ibalanse ang pagpanginabuhi ug paghatag og emosyonal nga panginahanglanon sa mga anak aron nga malikayan ang susama niini nga mga kaso.
"Importante gyud sa mga ginikanan nga dili lang sa permi lang ta panginabuhi we need to give time to our children nga atong mailhan, masinati nato atong mga anak sa unsa ilang mga needs,unsay ilang mga problema nga mahimong open minded ang usa ka inahan," dugang ni Dahino.