PALO, Leyte - Kapin sa 40 ka drug-related cases nga naglambigit sa kapulisan buot ipaabli pag-usab sa Philippine National Police (PNP).
Matod sa Regional Internal Affairs Services (RIAS) 8, dunay 49 ka drug-related cases sa Eastern Visayas ang ilang ablihon ug susihon pag usab.
Ang maong mga kaso mga administrative cases nga gipasaka batok sa kapulisan nga nalambigit sa mga anti drug operations nga miresulta sa pagkamatay sa mga suspek.
Giklaro sa RIAS nga kadto rang drug-related operations gikan July 2016 ngadto sa 2018 ang ilang ablihon.
Sagad sa mga kaso nga ablihon mao ang na-dropped gumikan kay way nakita nga probable cause.
“In PRO 8 alone, there are 49 drug-related cases to be reopened and reinvestigated and have full-blown hearings,” pasabot sa PRO 8.
Matod ni Police Brigadier General Dionardo Carlos, direktor sa PRO8, ning maong paagi ilang ipakita sa publiko nga seryuso sila sa ilang internal cleansing.
“The PNP is serious and very transparent in our internal cleansing campaign. So, we are exerting and extending all our efforts to comply with this not just for compliance purposes but on a religious basis towards a clean organization,” matod ni Carlos.
Giklaro ni Police Colonel Jesse Perez sa RIAS 8 nga ang direktor gihapon sa PRO 8 dunay katapusang hukom sa ilang himuon nga rekomendasyon sa kaso.
Gisiguro sa RIAS nga way exempted sa ilang pagahimuon nga pag-abli ug gisiguro nga patas ang ilang pagabuhaton nga imbestigasyon. (JKDP)