ORMOC City, Leyte -- Liboan ka mga tawo ang nisaksi sa gipahigayon nga State of the City Address ni Ormoc City Mayor Richard Gomez, alas 2 sa hapon, Martes, Oktubre 15, 2019 sa Ormoc City Superdome.
Gipangladlad sa mayor ang iyang mga nahimo sa pagdumala sa Dakbayan sama sa peace and order, edukasyon, turismo, imprastraktura, health, sports ug cultural, trade and commerce, agrikultura ug disaster preparedness.
Sa peace and order, gisulti ni Gomez nga malampuson ang iyang administrasyon nga nadeklarar nga drug-cleared ang Ormoc gikan sa pagka drug capital sa Eastern Visayas ug nahimo usab nga safest city sa Pilipinas.
Sa turismo, gipasigarbo ni Gomez ang nagkataas ang tourist arrival ug mga dagko nga conference nga gihimo nga nakahatag og income sa dakbayan.
Karong buwana, ilunsad na usab ang World War II gallery sa Ormoc Museum.
Gitutukan usab sa mayor ang edukasyon sama sa padayon nga pagdawat og mga eskolar.
Ang Dakbayan dunay 395 full college scholars nga dunay P18,000 nga tuition ug uban pa nga allowances diin duna nay 26 ka honor graduates, tulo niini magna cum laude.
Gipahibawo usab sa mayor nga gisugdan na ang paghimo og scholarship sa gusto mag doktor ug abogado.
Sa natad sa negusyo, gipasigarbo sa Mayor ang nagkadaiyang negusyo nga magsugod sama sa mga dagkong hotels.
“We have had a P33 million increase in revenue from local taxes in 2018, and we expect that to increase this year” matod sa Mayor.
Sa panlawas ug social welfare, gisugilon sa Mayor nga nanguna ang Ormoc sa CPR-Ready nga dunay 12,000 nga trained personnel.
Nakadawat ang Ormoc og Red Orchid Award tungod sa hugot nga pagpatuman sa no smoking ug gipasigarbo usab ang drug rehabilitation program.
Sa sports, nahimo nga kampyeon sa duha ka tuig ang Ormoc sa Eastern Visayas Regional Athletic Association (Evraa) 2018 ug 2019.
Morepresentar na usab ang Ormoc sa Modern Pentathlon sa Southeast Asian (SEA) Games karong Disyembre.
Sa agrikultura, gipasigarbo ni Gomez ang unom ka mga award nga nadawat sa mga farmer ug agriculture technicians.
Sa imprastaktura, gisugilon sa mayor ang daghan ug dekalidad nga imprastraktura nga gitukod.
Gani nahatagan og award isip Top Model Cities tungod sa “concrete ideas” sa mga infrastructure programs.
Gani, dunay dagko nga mga pundo ang gigahin karon alang sa mga kasada sa kabukiran.
Sa disaster preparedness, gipasigarbo ni Gomez ang dekalibre nga mga ekipo sama sa mga rescue vehicles, rescue boats ug mga well equiped personnel sa City Disaster Risk Reduction and Management (CDRRM) nga buot usab sa mayor nga makatabang sa ubang lungsod kon gikinahanglan.
Gihatagan usab sa mayor ang mga konsehal og tagsa-tagsa ka mga balaudnon nga angay ipasar.
Katapusang gihisgutan sa mayor ang water system sa dakbayan diin duna nay pagahimuon nga feasibility study sa Lake Danao nga maoy himuon nga source.
Gitapos ang Soca dihang gihatag ni Gomez ang proposed annual budget sa 2020 ngadto ni Vice Mayor Toto Locsin Jr. nga nagkantidad og P1,621,742,199.
Miani og 24 ka pakpak ang Soca ni Gomez, kinsa dali nga migakos ug mihawok sa iyang asawa nga si Cong. Lucy Gomez ug nilamano sa mga mayor sa laing lungsod ug mga kaubang opisyal sa City Hall.