GIPASAKAAN nag kasog estafa sa mga sakop sa Pardo Police Station ang nagpailang sales agent sa usa ka dakong hotel nga naa nahimutang sa uptown area sa Siyudad sa Sugbo human giingong nangilad sa iyang kustomer.
Ang nadakpan sa entrapment operation sa miaging semana giilang mao si Vince Russel Inot Durens, 25, taga Rizal st.,, Poblacion, Medellin, amihanang Sugbo, apan kasamtangan nga nagpuyo sa Orientel Poblacion, lungsod sa Consolacion, Cebu.
Matod ni Police Captain Alvin Llamedo, hepe sa Carbon Police Station, kanhi trabahante si Durens sa dakong hotel, apan bisan di na kini konektado, giingong padayong namaligya og mga lawak.
Giingong katapusang biktima mao ang usa ka magtutudlo sa usa ka unibersidad sa downtown Cebu City nga si Dwight Jimenez Ypanto, 30, minyo, taga Zone 2, Kawayan, San Isidro, Talisay City, Cebu.
Gibaligyaan niya kinig tulo ka kwarto alang sa Sinulog sa sunod sa tag P3,000.
Nagduda na si Ypanto nga ilad ang gihimo ni Durens kaniya, nanawag dayon siya sa hotel aron kompirmahon kon aduna ba silay trabahante nga si Vince Russel Inot Durens.Hugot kining gihimakak sa management.
Nagpatabang dayon ang hotel sa Carbon Police Station niadtong Biyernes, alas 10:30 sa buntag, Oktubre 11, diin gihimo ang entrapment operation sud sa tunghaan.
Sa dihang gitunol na ngadto kang Durens ang kwarta, gisignit dayon siya sa mga pulis nga niadtong tungora nagtan-aw sa gihimo sa suspek.
Nabawi sa kapulisan ang P3,000 nga maoy ebedensya sa iyang pagdawat sa salapi. “Ang iyang giangkon kato rang transaction niya kang Ypanto. Pero na diskobrehan karon nga daghan diay kay naay daghang complainant niya,” matod ni Llamedo sa Superbalita Cebu. (AYB)