SUPERBALITA CEBU

Armado gipusil sa pulis tinun-an maoy naigo

NALANDIG sa tambalanan ang 21-anyos nga tinun-an human kini naigo sa saag nga bala gikan sa nahitabong pagpamusil tali sa pulis ug armadong taw, niadtong Lunes Oktubre 14.

Ang insidente nahitabo sa dalan S. Osmeña, Barangay Gun-ob dakbayan sa Lapu-Lapu. Ang napagang biktima nailhan nga si Alex Magallano Benolirao, kinsa nakaangkon ug samad pinusilan sa iyang bukton.

Matod ni Police Chief Master Sergeant Joseph Andrin, desk officer sa Police Station 3 sa Lapu-Lapu City Police Office (LCPO) nga si Benorilao aksidenteng maoy naigo sa bala sa pulis nga si Police Staff Sergeant Chrishmarlin Lim dihang pusilon unta ang usa ka armadong tawo nga nailhang si Nelson Mabida Moradas, 32, taga- Barangay Gun-ob gamit ang iyang Gloc 9mm nga service firearm.

Giingong nagmotosiklo niadtong tungora si Lim dihang iyang nakit-an si Moradas nga nagbitbit sa wala matinong armas.

Gisita ni Lim si Moradas apan inay mosanong giingong mihana kini ug punting sa iyang armas sa maong sa pulis hinungdan nga gi-unhan sa pagpusil ni Lim.

Apan giingong nakalihay si Moradas hinungdan nga naigo si Benorilao kinsa luwan sa traysikol nga atol nga mi-agi sa dapit nga nahitabo-an.

Dali kining gidala sa tambalanan sa pulis samtang si Moradas dali usab nga gisikop sa mga sakop sa City Mobile Force Company CMFC nga miresponde usab sa nahisgotang alarma.

Dihang gikuha ang armas nga giingong gidala-dala ni Moradas dinhi na usab masuta nga usa diay ka duwa-an o replica ang armas nga iyang gibitbit.

“Ambot unsay nasud sa utok ani tawhana nga nagdala-dala man ug armas nga replica wala man unta ni record sa amoa,” matod ni Andrin.

Gikatakdang mag-atubang gihapon ug kasong kalapasan sa Republic Act RA 10591 si Moradas sa iyang pagdala-dala ug duwa-ang pistola.

Samtang gikatakdang si Lim usab maoy mo-abaga sa tanang bayranan sa tinun-ang si Benorilao.

Nagka-estorya na matod pa ang pulis ug sa amahan sa tinun-an sanglit usa usab kini ka pulis sumala pa ni Andrin. (GCM)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph