ADUNAY nagdumot o ang giingong pagkalambigit sa illegal drugs maoy gitan-aw karon sa Labangon Police Station, Cebu City Police Office sa pagpusil-patay sa 23 anyos nga lalake.
Tug-an pa ni P/Maj. Henrix Bancoleta, hepe sa Police Station 10 nga ilang gisubay ang angulo nga personal grudge nga posibleng motibo sa pagpusil ni Reynaldo Huntong alyas Aldong, 23 nga taga-Sityo Kadasig Phase 2, Barangay Tisa, dakbayan sa Sugbo.
Base sa imbestigasyon nga nagbarug-barog ang biktima ingon sa adunay gipaabot sa may Sityo Mansanitas, Tisa niadtong adlawng Martes, Oktubre 15 sa kadlawon.
Saysay sa nakasaksi nga adunay motorsiklo ang miabot usa ka lalake ang mikanaog nga nagbaktas paingon sa nahimutangan ni Huntong.
Nadunggan ang lanog nga buto sa armas ug nakit-an pa kadtong lalake kansang nawong gitaptapan ang nagdali-dali sa pagsakay pagbalik sa motor nga giparada sa unahan.
Samtang paryente sa gipatay mibutyag nga tigbaligya og shabu ang iyang pag-umangkon kaniadto, gani sigehan na kini og badlong apan giingong gahi og ulo.
Dugang inpormasyon sa pulis nga usa ka gihinganlan og Aki ang katapusang gika-uban ni Huntong sa wa pa kini gipusil. (BBT)