GINANG nga pipila ka buwan mag-senior citizen na mag saulog sa iyang ika 60 nga adlaw nga natawhan sulod sa bilanggoan karong Disyembre human siya masikop sa buy-bust sa mga pulis sa Waterfront Police Station sa Cebu City Police Office (CCPO) sa iyang balay sa Barangay Ermita, Siyudad sa Sugbo.
Si Perla Abanto, 59, nasakmitan og P47,000 nga balor sa shabu human siya gironda sa mga sakop sa Drug Enforcement Unit (DEU) sa Waterfront Police pinangulohan sa hepe, P/Major Joemar Pomarejos.
Matod pa ni Pomarejos nga naplano ang pagdakop kang Abanto human usa sa ilang nadakpan nga na kuhaan og mga pakete sa shabu niangkon nga iyang suki tigpalitan sa Barangay Ermita ug gitudlo si Abanto isip tinubdan.
Ang dinakpan napalitan na pila ka higayon sa mga operatiba hangtud nga giplano na ang operasyon batok kang Abanto.
Samtang si Abanto, sa interview sa Superbalita Cebu, niingon kay wa na siyay trabaho, siya napugos sa pagpamaligya og shabu aron ikapakaon sa iyang anak nga dunay disability.
Si Abanto kasamtangan nga gitanggong sa Waterfront Police Station alang sa pagpasaka og kasong kalapasan sa Republic Act 9165 kun Comprehensive Dangerous Drugs Act of 2002.
Samtang sa buy-bust sa San Nicolas Police Station sa Barangay Suba ning siyudad, nasikop nila ni P/ Maj. Kenneth Paul Albotra, hepe, si Jimwel Mejias, 20, traysikad drayber, lumad nga taga lungsod sa Minglanilla. (BBT)