MCWD board officials gitaktak ni Labella

GIPUTOL ni Mayor Edgardo Labella ang serbisyo sa lima ka board of directors sa Metro Cebu Water District (MCWD) sugod sa Oktubre 15, 2019 gumikan sa ilang kapakyas pagsulbad sa problema sa tubig.

Si Labella nagkanayon nga ang mga local government unit (LGU) ug Probinsya sa Sugbo sa kinatibuk-an nipadayag sa ilang kadismaya ug diskuntento sa serbisyo sa water district.

Ang board maoy nagsilbing policy maker aron masolusyonan ang matag tuig nga problema sa tubig.

Kini gilangkuban sa Dakbayan sa Sugbo, Mandaue ug Talisay samtang apil ang mga lungsod sa Cordova , Consolacion, Lilo-an ug Compostela.

“ It is with a heavy heart that I write this letter to formally inform you that your services as the Chairman and a Director of the Board of MCWD are hereby terminated,” tipik sa notice of termination nga gipadala sa mayor nga gidawat sa Board of Directors Office alas 2:34 sa Martes sa hapon.

Ang mga konseho sa Dakbayan sa Sugbo, Mandaue ug mga lungsod sa Consolacion, Liloan ug Cordova ningpalabang og resolusyon nga ningpadayag sa ilang kasagmuyo sa serbisyo sa MCWD.

“It is a fact that the consumers of MCWD have been greatly dissatisfied with its present service,” matod sa mayor.

Ang suwat ni Labella alang kanila ni Joel Mari Yu, isip chairman, Vice-chairman Atty. Ralph Sevilla, kanhi Cebu City councilor Augustus Pe Jr., Atty. Procopio Fernandez ug Atty. Cecile Adlawan.

Gawas kang Fernandez, kinsa tinudlo ni kanhi mayor Michael Rama niadtong 2015, ang ubang mga sakop sa board pulos tinudlo ni kanhi Cebu City mayor Tomas Osmeña.

Ang mga termino sa mga appointee ni Osmeña mapupos sa 2022 hangtod 2024 sanglit sila gihatagan og unom ka tuig sa pagserbisyo.

“The power to appoint carries with it the power to remove or discipline. Thus, pursuant to the authority granted to me by the provisions of P.D. 198, as Mayor of the City of Cebu, I am now exercising this power, subject to the review and approval of the Local Water Utilities Authority as per Section of P.D. 198,” dugang ni Labella.

Si Acting Administrator Jeci Lapus, sa LWUA way pagbabag sa tinguha ni Labella pag-terminate sa serbisyo sa lima ka board members kansang suwat gipadala niadtong Septiyembre 30 niining tuiga.

Kana kon nasubay kini sa nalatid sa Presidential Decree No. 198.

“This office interposes no objection to your plan to remove the incumbent MCWD directors within the bounds of the law consistent with the last sentence of Section 11, of PD No. 198, as amended,” tipik sa suwat ni Lapus niadtong Oktubre 1.

Ang section naghisgot og “cause” nga maoy basehanan nga mahimong mataktak ang bisan kinsa nga sakop sa board.

Apan wa kini klaro kon unsa “cause” nga mamahimong.

Sa suwat ni Labella, iyang gitumbok ang kasagmuyo sa mga LGU nga ubos sa franchise sa MCWD sa serbisyo niini.

Ning nakalabay nga mga semana, ang mga Siyudad sa Sugbo ug Talisay nangrasyon og tubig sa pipila ka mga barangay tungod sa kakuwang sa supply.

Gitumbok sa MCWD ang pag-ubos sa water level sa mga dam sa Jaclupan sa Dakbayan sa Talisay ug Buhisan sa Dakbayan sa Sugbo nga nakapasamot sa kakuwang sa water supply.

Si Liloan Mayor Christina Garcia-Frasco nipadayag usab sa iyang kasagmuyo sa serbisyo sa MCWD ngadto sa mga lumolupyo sa iyang lungsod bisan kon naa sa ilaha ang 17 ka wells sa MCWD.

Ang Superbalita Cebu nisuway og tawag kang Yu apan way nitubag sa iyang cellphone.

Bisan si Sevilla wa usab motubag.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph