HUMAN makapuyo sa usa ka balay nga ginama sa kahoy, gitaptapan og tarp, uban ang iyang pamilya, diha sa Bago Gallera, Davao City gikan 2002 ngadto 2010, ang bag-ong Aiba Women’s World champion Nesthy Alcayde Petecio mas mapasigarbuhon sa naangkon niyang kalampusan sa Ulan-Ede, Russia.
Siya modawat og P1 million nga cash incentives gikan sa nasyunal nga gobyerno pinaagi sa Philippine Sports Commission (PSC) human niya makuha ang women’s featherweight gold medal sa split decision win kontra Russian nga si Liudmila Vorontsove, Dominggo, Oktubre 13, oras sa Pilipinas.
Suma niya, unsa mang makuha niya iyang ipalit og luna ug aron makumpleto ang konstruksiyon sa ilang balay sa Barangay Tuban, Sta. Cruz, Davao del Sur.
“Para ni sa akong pamilya ako sakripisyo always Mam. Starting pa lang nga nag boxing ko para ni nila jud,” niya sa Sun.Star Davao sa Facebook interview.
Niya, ang balay nila sa Tuban may tulo ka lawak, diin plano niyang padak-an pa ni, dugangan og duga ka kwarto tungod nagkadako sab ang ilang pamilya.
“Daghan pa kulang Mam. Pero mahuman na jud nako amoa gamay nga mansyon. Sauna trapal lang amoa balay, puyo balay nga dili sa amo. Karun naa na jud mi amoa maingon nga amo ning balay! Thanks God,” suma niya.
Niya, una pa ang bugno, tiunay na sa iyang huna-huna nga maangkon niya ang gold kontra Vorontsove.
“Buo kaayo akong huna-huna og akong puso nga ako ang gold. Mao na dagan sa akong isip og dughan sa mga orasa nato og wala ko gibigo sa Ginoo. Buutan kaayo ang Ginoo.”
Aminadong gipangulbaan sa iyang pakigharong sa Ruso, apan gipadaplin ni Petecio ang kabalaka, ug gilig-on ang kaugalingon nga di gyud magpapildi.
“Sa tanang tao nga gasalig nako og padayun nga nagsalig sa akoa. Daghan kaayo salamat ninyo. Dili nako maexplain ang ako kalipay karun labi na para sa akong pamilya ni tanan. Sa akong mga coaches Nolito Velasco, Reynaldo Galido, salamat sa inyoha support og pagtuo. Sa Abap family nako, kay Sir Ricky Vargas, Sir Ed Picson, Mam Karina and Sir MVP, kay PSC chairman (Butch) Ramirez og Commissioner Charles Raymond Maxey; sa University of Baguio, to President Duterte, sa pamilya nako, sa tanang friends nakong kaila, mga Pinoy sa Winnipeg, Canada. Sa akong uyab Alexa, mga igsoon nako. Sa mga taong nagtabang kung asa ko karun - Coach Roel Velasco og Sir (Dodong) Revamonte. Sa tanan tanan na. Labi na sa Ginoo. Daghan kaayong salamat sa pagtuo og suporta ninyo,” mensahe sa mapasigarbuhong si Petecio.