NAGMAYA ang mga Dabawenyo, ilabi na kadtong nakaila kang Lieutenant General Archie Francisco Gamboa, kinsa nilingkod nga officer-in-charge sa Philippine National Police (PNP) human niluwat si PNP chief General Oscar Albayalde sa pwesto.
Nakaila kaayo ako ni Lt. Gen. Gamboa sa dihang siya pa ang tigpamaba kaniadto sa Police Regional Office (PRO) 11 sanglit mabi-abihon kaayo siya sa mga sakop media.
Sa akong pagkaila niya, ligdong kini nga opisyal sa kapulisan, mao nga angayan siya sa maong trabaho.
Sa iyang pagpamulong atubangan sa iyang mga ginsakpan, siya nagkanayon: “Let’s do our job. Let not the other controversies affect us. Let’s continue to work, which is to serve and to protect our people.”
Giingon ni Gamboa nga si President Rodrigo Duterte nagmando kaniya nga ipadayon ang trabaho sa kapulisan sa matag adlaw ilabi na ang iyang popular nga kampanya kontra druga.
Si Gamboa, isip usa sa mga gipilian nga mohupot sa pinakataas nga pwesto sa PNP, daghang mahimo sa ilang han-ay isip batid usab nga abogado.
Ug isip ligdong nga opisyal, nakaseguro ako nga di kini malambigit sa ilegal nga buhat sa kapulisan.
Mas labaw na nga di malambigit sa pagpanalipod sa mga “ninja cops” nga maoy nagpaluyo sa pagresaykol sa mga nakompiska nga druga.
Ambot bitaw ning han-ay sa kapulisan, bisan gidoble na ang ilang sweldo, maningkamot gihapon nga manapi sa ilegal nga paagi.
Sayang lang ang buhis sa katawhang Pilipino nga maoy gikuhaan sa ilang sweldo kay napaingon sa mga barumbado nga opisyales sa gobyerno.
Hangtud nga way kaabag ang atong pangulo sa paglimpyo sa gobyerno, bisan pa og triple ang ilang sweldo, magpadayon gihapon kining anomalya sa kapulisan ug uban pang ahensya.
Kitang kabus mabuktot sa pagtinarbaho aron dunay makolektang buhis ang gobyerno, apan ang mga kurakot namilyonaryo sa dagko nga suweldo nga di maayo ang serbisyo.