DIGOS CITY -- Nangandam na ang National Telecommunications Commission (NTC) sa Rehiyon sa Davao aron pasirad-an ang kapin kun kulang 40 ka mga istasyon nga nakitaan og pagsupak sa balaod.
Gibarugan sa NTC-Davao nga girekomenda nila ang pagpasirado sa istasyon sa radyo tungod kay wa kini lisensiya apan nagpadayon gihapon sa ilang operasyon bisan ug nakasupak sa teknikal nga aspeto sa pagsibya.
Sumala ni NTC regional director Nelson Canete nga nagpaguwa na sila og cease and desist order sa maong radio stations sa rehiyon ug padayon nilang gi-monitor.
Una nang mihimo og ocular inspection ang NTC sa maong mga istasyon kung diin nakompirma nga adunay mga kalapasan.
Nasayran nga sagad sa ipasiradong istasyon gipanag-iyahan og mga politiko sa mga probinsiya apan ang uban niini ang boluntaryo nang nanira human masayod nga di gyud nila angayang ipadayon ang operasyon.
Sa maong 40 ka mga lokal nga istasyon, 10 niini ang ania sa probinsiya sa Davao del Sur, 5 sa Davao del Norte, 15 sa Davao Oriental ug Compostela Valley Province.
Dugang ni Canete nga nadugangan ang maong mga istasyon niadtong milabay nga eleksiyon ug gani aduna say natukod didto sa lungsod sa Jose Abad Santos sa Davao Occidental.
Giklaro sa opisyal nga gikinahanglan og franchise sa Kongreso ang pagtukod og istasyon ug gitataw nga lahi ang lisensiya ug lahi sab ang aplikasyon sa pagtukod og istasyon nga itugot sa NTC. (Orlando B. Dinoy)