TACURONG CITY -- Gikalagot karon sa pamilya ang pagpatay sa tulo ka mga kabanay atol sa drug operation sa mga awtoridad alas 9:40 sa gabii niadtong Lunes, Oktubre 14, sa probinsiya sa Sultan Kudarat.
Giila ang mga napatay nga sila Tato Dilangalen, Alano Sepi Usop, ug Bigboy Sepi Usop, mga nagpuyo sa Purok 2, Barangay Sinakulay President Quirino.
Sa taho gikan sa Sultan Kudarat Police Provincial Office, nasayran nga gironda sa kapulisan ug Philippine Drug Enforcement Agency (PDEA)-Soccsksargen ang balay sa mga suspek.
Apan sa diha nga pasulod na ang raiding team, gipabuthan sila hinungdan nga napugos kining nibalos sa mga suspek.
Napatay ang magsuon nga Usop ug ilang silingan nga si Dilangalen nga nakaangkon og daghang samad pinusilan sa nagkadaiyang bahin sa lawas.
Narekober sa mga awtoridad gikan sa posisyon sa mga suspek ang usa ka homemade 9mm pistol, usa ka granada ug daghang shabu.
Ang pagronda sa PNP ug PDEA base sa search warrant nga giisyu ni Judge Milanio Guerrero sa Regional Trial Court 12 Judicial Region Branch 20 sa Tacurong city.
Apan gipamugos sa pamilya nga wala nanukol ang mga suspek nga napatay apan gipamusil sa mga pulis ug PDEA.
Hugtanon sab kining gipanghimakak sa mga awtoridad kon diin nagkanayon nga una silang gipabuthan sa mga suspek ug napugos lang sa pagbalos. (Edgar E. Fuerzas)