Pagpatay sa 68-anyos, nagpalibog sa pulis

STA. MARIA, Davao Occidental -- Makuting imbestigasyon ang gihimo sa Sta. Maria Municipal Police Station labot sa pagpusil-patay sa usa ka 68-anyos.

Ang insidente nahitabo alas 5:50 sa hapon niadtong Huwebes, Oktubre 10, sa Sitio Tibungoy, Barangay Poblacion, Sta. Maria, Davao Occidental.

Subay sa impormasyon gikan sa journal sa Police Regional Office (PRO) Davao Region, nasayran nga ang biktima mao si Carlos Jimenea Cirilo, minyo, ug nagpuyo sa Purok Talisay, Sitio Pugad Buaya, Barangay San Isidro sa maong munisipalidad.

Wala gipadaplin sa kapulisan Sta. Maria Municipal Police Station ang anggulo nga personal nga bangi tali sa biktima ug sa wa pa maila nga mamumuno.

Gikonsidera sab sa kapulisan sa ilang imbestigasyon ang giingong pagpasaka og kaso sa biktima batok sa mga kabanay sa iyang kapuyo nga tua nagtrabaho sa abroad.

Nag-ugat ang pagpasaka og kaso sa biktima ngadto sa mga kabanay sa iyang kapuyo bahin sa pagkustodiya sa anak gumikan wala suma pa gibalik sa pag-atiman ngadto kaniya, apan kini gitaktak sa korte.

Samtang gikasohan sab ang biktima sa mga kabanay sa iyang kapuyo og kasong Acts of Lasciviousness in relation sa Republic Act 7610 diin naa pa kini sa korte.

Giapil sab sa awtoridad ang giingong away sa biktima batok sa usa ka nanag-iya og yuta sa Barangay San Agustin sa Sta. Maria.

Sumala sa anak nga lalaki sa biktima, tuig 2013 ug 2014 ang biktima nakadawat na og bahad sa kinabuhi diin ang ilang balay sa Brgy. Catalunan Grande sa Davao City, gibitayan og granada diin tungod sa bahad, mipuyo ang biktima sa Sta. Maria.

Si Cirilo nailhang usa sa mga aktibo nga militante sa Davao Region.

Niining kasamtangan, ang kapulisan sa Sta. Maria MPS padayong naghimo og makuting imbestigasyon sa krimen aron maila ug masikop ang mga mamumuno.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph