ANGAY nang magpakabana ang publiko sa problema sa tubig sa Sugbo, labi na sa Metro Cebu. Ang kakuwang sa natural nga tinubdan sa tubig nahimong komplikado tungod sa subrang pamulitika sa mga opisyal.
Nagkadako ang konsumo sa tubig sa Sugbo tungod sa nagkatas nga populasyon ug demanda sa paspas nga ekonomikanhong kalamboan.
Apan taudtaod na kining nasuta sa daghang sayantipikong pagtuon nga may mahitabong dakong krisis sa tubig kon walay dinalian ug malahutayong solusyon. Bisan ang University of San Carlos (USC) dunay lawom ug komprehensibo nga pagtuon sa kahimtang sa tubig sa Sugbo.
Mao kini hinungdan nga daghang nanggawas nga ideya o mga sugyot nga solusyon apan subo nga pamalandungon nga walay klarong nakairog sa pagpatuman sa plano hangtod karon. Pulos lang pabula sa baba.
Ngano? Walay tino nga political will ang liderato sa lokal nga kagamhanan. Maalarma lang kon tinghuwaw nga magnihit ang tubig. Kon maulian na ang sitwasyon, balik na sa naadan sa nagmika nga trabaho.
Ang nahitabong kontrobersiya sa Metro Cebu Water District (MCWD), diin matay-og kanunay matag hulip sa administrasyon, tataw nga ehemplo sa subrang pamulitika.
Matimahoan nga may hiniusang pwersa sa pagtaktak sa mga miyembro sa Hunta sa MCWD nga mga tinudlo ni kanhi mayor Tomas Osmeña, hinuon, ang naulahi may susamang lakang niadto sa paggukod sa dili mga kaalyado. Weder-weder lang.
Ang ato lang nga dili na dugangan ang problema sa tubig. Dili tiaw nga gipasirad-an ang water wells sa pipila ka LGUs nga usa sa mga tinubdan sa MCWD. Nisamot kanihit ang tubig. Maayo na lang nga panahon sa ting-uwan. Ang epeko sa pagtumaw sa kontrobersya sa MCWD dili susama sa ting-init o huwaw.
Magpakabana kita uban sa pag-ampo.