SUPERBALITA CEBU

26 anyos maoy killer sa dalagita?

(SunStar file foto)

NAA na sa kustodiya sa Pinamungajan Police Station ang 26 anyos nga lalake nga gitumbok nga person of interest sa linuog nga pagpatay sa 14 anyos sa sitio Caimito, Barangay Guimbawian, bukirang dapit sa lungsod sa Pinamungajan.

Matod ni Police Major Felicisimo Aranas, Jr., hepe sa Pinamungajan Police, nga ilang nakuha ang lalake nga wa lang una niya nganli sa balay sa iyang inahan sa Barangay Lahug, Siyudad sa Sugbo, pasado alas 8 Martes sa gabii, Oktubre 15.

Apan gitug-an ni Aranas nga di pa nila matumbok siento porsiento nga suspek na ang lalake tungod kay wa pa silay solido nga ebidensya nga magtudlo niini nga maoy nipatay kang Justine Andayop.

Mahimo ra nila kining buhian kon mamatud-an nga wa siyay salaod nga nahimo sa dalagita.

Ang igsuon sa suspek nitug-an sa kapulisan nga nianang Lunes sa alas 8 sa buntag sa dihang nangita na ang mga igsuon ni Justine, naligo kini nga gikatingala nila tungod kay di kini tig kaligo sayo sa buntag.

Sa dihang napalgan ang lawas ni Justine, dali usab kini nga nilakaw ug wa na masayri kon asa niadto.

Ilang giadto ang balay sa iyang inahan sa Lahug nga usa ka security guard sa IT Park.

Hugot nga gihimakak sa lalake nga siya ang nagpatay kang Justine kay nianang adlawa aduna siyay giadto sama sa pagpanguhag mangga ug namupo og mga bunga sa tamatis sa nagkalain-lain nga barangay sa Pinamungajan.

Matod ni Aranas nga ila kining subayon.



“Mi-deny gyud siya kay daghan siyag giingon nga milakaw siya. Mao sad ni atong himuon ron. Adtuon nato tong mga lugar nga iyang giingon nga didto siya kay nanguhag mangga,”dugang ni Aranas.

Bisan ang lalake, dihang gidala sa kapulisan ngadto sa PNP Crime Laboratory, nisulti sa mga tigbalita nga wa siyay kalabutan sa pagpatay.

“No, Sir. Wala gyud ko,” matod sa lalake.

Samtang si Police Corporal Therese Bellones sa Women and Children Protection Desk sa Pinamungajan Police, niingon nga ilang gi-pick-up ang 26 anyos kay nagduda ang mga kabanay ni Justine ug mga silingan. Matod ni Bellones nga kadudahan ang mga lihok kay daling nibiya sa barangay human mabaniog ang pagkawala ni Justine.

“Among gipang-interview ang mga silingan. Among gisumpay sumpay ang mga tubag. Siya ang gidudahan sa kasilinganan kay sa pagkahitabo siya ang milakaw sa area ba,” nagkanayon si Bellones sa interview sa mga tigbalita.

Inay motipon sa tapok sa mga tawo, nilakaw kini hinungdan nga gidudahan.

Giangkon hinuon ni Aranas nga wa pa silay saksi nga nakakita sa pagpatay ngadto sa dalagita gawas sa pamahayag sa mga tawo sa lugar nga nakit-an nila kini nga nagbaid sa iyang sundang nianang Dominggo sa hapon, Oktubre 13.

Apan nipasabot ang 26-anyos nga ang sundang nga iyang gibaid gigamit niya sa pagpangahoy.

Nakakuha hinuon ang mga imbestigador og sapot nga adunay mantsa sa dugo apan, ila pang ipaubos sa DNA test.

Mi request na sila sa PNP Crime Laboratory nga makuha ang sapot nga adunay gituohang lama sa dugo.

Si PNP medico legal officer Benjamin Lara, sa interview sa mga tigbalita, niingon nga ang swab sample nga nakuha niya gikan sa lawas ni Justine iyang itandi ngadto sa 26 anyos.

Samtang si Police Colonel Roderick Mariano, hepe sa Cebu Provincial Police, nitug-an sa Superbalita Cebu nga aduna silay nakuha nga cellular phone sa person of interest ug biktima.

Iya na kining gipadala sa PNP Cyber Crime Group 7 aron mapaubos sa forensic examination sanglit nagtuo siya nga naay makuha nga importanteng kasayuran nga makatabang sa imbestigasyon. (AYB & BBT)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph