PADAYON gihapon ang panerbisyo sa mga kawani sa Metropolitan Cebu Water District (MCWD) bisan sa nahitabong pagpanaktak sa ilang mga board of directors niadtong Martes, Oct. 15, 2019.
Sa usa ka press release, gibutyag sa mga opisyales sa MCWD nga "business as usual" lang gihapon ang ilang buhatan og padayon silang muserbisyo para sa ilang mga konsumedor nga grabeng naapektohan sa grabeng tingnihit sa tubig karung mga panahona.
"MCWD assures the public that it continues to do its best to serve the needs of its consumers especially those affected by the water supply shortage," sigon sa ilang press release.
Niadtong Martes, Oct. 15, nagpadala si Cebu City Mayor Edgardo Labella og notices of termination sa lima ka miyembro sa MCWD Board of Directors tungod sa ilang kapakyas sa pagsolbad sa krisis sa tubig sa Metro Cebu.
Lakip sa mga gitaktak ni Labella mao si MCWD chairman Joel Mari Yu, vice chairman Ralph Sevilla; si Augustus "Jun" Pe Jr. ug Procopio "Coping" Fernandez, puros kanhi konsehal sa dakbayan sa Sugbo; ug si board secretary Cecilia Adlawan.
Gawas ni Fernandez, ang mga sakop sa MCWD Board of Directors puros mga tinudlo ni kanhi Cebu City Mayor Tomas Osmeña. (JKV/PR)