SUPERBALITA CEBU

Editoryal: Pulitika ni Labella

Editorial cartoon by Ariel Itumay

GIPANGTAKTAK na ni Cebu City Mayor Edgardo Labella ang lima ka mga sakop sa board of directors sa Metropolitan Cebu Water District (MCWD) sugod niadtong Martes, Oktubre 15.

Kini dakong sukwahi sa iyang pamahayag niadtong Septiyembre 25 nga iyang respetohan ang termino sa mga MCWD officials.

Ang matangtangan sa ilang serbisyo sa MCWD mao ang chairman sa board nga si Joel Mari Yu, vice vchairman Ralph Sevilla, Augustus Pe Jr., Cecilia Adlawan ug Procopio Fernandez.

Gihimong rason ni Labella sa iyang pagtaktak sa mga sakop sa board mao ang kapakyas niini sa pagsulbad sa krisis sa tubig nga miigo sa Metro Cebu.

Apan bisan pa man niini, di malikayan nga mosubaw ang pagduda nga pulitika maoy nagpaluyo niining tanan. Kini tungod kay gawas kang Fernandez ang upat nga gipangtaktak pulos man mga tawo ug tinudlo ni kanhi Cebu City mayor Tomas Osmena.

Posibling ang katuyo-an mao nga hinayhinayan na og putol ang mga gaway ni Osmena, ang ilang kaatbang sa politika.

Pero sa gihimo ni Labella karon dili lang kay si Osmena ang iyang naigo kon dili lakip na usab si Vice Mayor Mike Rama. Kini tungod kay si Fernandez kinsa maoy bugtong tinudlo ni Rama sa MCWD board niadtong mayor pa siya, nalakip man sab sa gitaktak sa mayor.

Dili kaha magdugang kini og sugnod sa gihugon-hugon nga nag-umidong panagbikil ni Labella ug Rama bisan pa man og anaa sila mopasilong sa susamang partido sa pulitika?

Nabaniog kini kaniadto pa nga si Rama interesado nga modagan og balik pagka mayor sa sunod pinili-ay.

Duna nay gihan-ay si Labella nga mga tawo nga mopuli og lingkod sa board sulod ning semanaha. Atong tan-awon kon ibalik ba niya si Fernandez isip pagrespeto sa iyang vice mayor karon.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph