PAAMAGON og suway sa Cebu Sharks-Casino Ethyl Alcohol ang nagkangitngit nilang paglaom alang sa playoffs sa ilang pag-asdang sa host Bacolod Master Sardines sa Maharlika Pilipinas Basketball League (MPBL) Lakan Season sa University of St. La Salle sugod karong alas 9:00 sa gabii.
Gilauman nga kulbahinam ang panag-engkuwentro sa duha ka mga kampo hilabi na kay pareho silang naggunit og 6-10 nga rekord.
Sa labing ulahi nilang tahas, ang Sharks nasugamak sa dakong kapildihan batok sa Bacoor Strikers, 71-88. Ang maong kapildihan maoy nagduso sa Sharks sa ikasiyam nga dapit sa Southern Conference nga gawas na sa esena sa playoffs.
Ang mopatigbabaw nga walo sa matag Northern ug Southern Conference mao ang makasulod sa playoffs.
Giangkon sa pambatong sentro sa Sharks nga si William McAloney nga sa kasagaran, magkagidlay sila sa hinapos nga bahin sa duwa ug mao kini ang ilang gipaningkamutan nga mausab.
“Sometimes, we have a really good start but then, sputter at the end,” matod ni McAloney sa interbyu s Sun.Star Cebu, igsuong buhatan ning mantalaan.
Ang Master Sardines pangulohan sa Sugbuanong si ex-PBA MacMac Tallo, kinsa produkto sa Southwestern University (SWU) Cobras. Kon kahinumdoman, ang Cebu Sharks nagtinguha unta sa serbisyo ni Tallo sa dihang gibuhian kini sa NLEX Warriors sa PBA.
Apan naunhan lang kini sa Bacolod Sardines. (JNP, ESL)