HINDANG, Leyte - Duha ka dagkong putos nga dunay sud nga puti nga powder ang gitugyan sa mga mananagat sa kapulisan sa Hindang.
Duna kini timbang nga 7.6 kilo, matod sa kapulisan sa lungsod.
Nasayran nga ang duha ka transparent plastic bags nakit-an sa mga mangingisda samtang sila nanagat sa kadagatan sa lungsod sa Dalaguete, Cebu niadtong Oktubre 5, 2019.
Usa sa mga mananagat nga si Harvey Fajardo nitugyan niini sa Hindang Police Station pasado alas 12 sa udto, Miyerkules, Oktubre 16, 2019.
Gipaubos pa karon sa qualitative ug quantitative examination ang powder sud sa duha ka dagkong putos aron matino kon unsa kini, shabu ba o cocaine.
Sa miaging mga buwan, napalgan sa nagkadaiyang mga bahin sa Pilipinas, labina sa northern nga bahin, ang mga pinutos nga cocaine nga balor og minilyon ka pesos.
Mga dapit diin kini napalgan nahimutang sa Eastern Luzon, Eastern Visayas ug Eastern Mindanao.
Gituohan kini nga kauban sa shipment sa illegal drugs nga gihug sa kadagatan. (JKDP)