3 ka tunghaan gipasidunggan sa tigi sa dokyumentaryo

ORMOC City, Leyte - Tulo ka mga tunghaan nakadawat og premyo sa gipahigayon nga Adolescent Health and Youth Development Summit ug Documentary Film Awarding sa multipurpose hall sa Ormoc City Hall, Huwebes, Oktubre 10, 2019.

Ang documentary dunay tema nga “The Youth and the Demographic Transition”.

Napulo ka mga tunghaan sa sekondarya sa dakbayan sa Ormoc ang niapil sa Documentary Film Awarding nga gipasiugdahan sa City Integrated Population and Gender Development Office (IPGDO).

Nangapil mao ang New Ormoc City National High School, Ormoc City Senior High, Cabintan, Dolores, Lilo-an, Linao, Margen, Genaro B. Laureñana, Valencia ug Rustico Capahi.

Nitambong sa kalihukan si Population Commission Regional Office 8 Director Elnora Pulga, City Councilor Perok Rodriguez, IPGDO head Jun Gallo ug judges nga sila si Roy Donaire sa IT Department, John Kevin Pilapil sa Media, Wilson Tolentino sa Mayor’s Office ug Ahlette Reyes sa Popcom 8.

Samtang si City Councilor Lalaine Marcos, kinsa didto sa University of Philippines (UP) alang sa National College of Public Administration and Governance (NCPAG), nihatag sa iyang mensahe pinaagi sa usa ka video.

Ang 3rd Prize nga P5,000 nadawat sa Linao National High School, 2nd Prize nga P10,000 nadawat sa City High ug 1st Prize nga P15,000 nadawat sa Ormoc Senior High.

Mapasalamaton ang IPGDO sa suporta nga gihatag ni Mayor Richard Gomez, Vice Mayor Toto Locsin Jr. ug mga konsehal sa pagpahigayon ning programa ug paghatag og premyo.

Gidayeg usab ni Pulga ang Dakbayan sa Ormoc sa paghatag og opisina alang sa IPGDO nga dakong tabang sa populasyon ug family planning sa dakbayan. Ang Ormoc Senior High ug City High ang ipadala na usab sa Regional Level Documentary Film Contest sa Nobiyembre. (PR)