LAPU-LAPU City nakig-alayon sa Manila City government alang sa dungan nga selebrasyon sa himuong 500 days countdown nga gipahaom sa ika-500 nga kasumaran sa pag-abot sa Kristiyanismo sa nasud ug Kadaugan sa Mactan.
Niadtong Oktubre 14, ang delegasyon sa Lapu-Lapu City nibisita sa buhatan ni Manila City Mayor Francisco “Isko Moreno” Domagoso uban sa pipila ka sakop sa Sangguniang Panglungsod, ug Cindi King-Chan, commissioner sa Mactan Quincentennial Committee.
Samtang adunay himuong kausaban sa Liberty Shrine sa Barangay Mactan, Lapu-Lapu nga bag-uhay lang gipaayo sa administrasyon ni kanhi mayor Paz Radaza agi og pangandam sa maong selebrasyon.
Ang tulo ka mga dakbayan nga naglangkob sa Manila, Lapu-Lapu ug Davao mao ang sentro sa 500 days countdown nga mahitabo sa Disyembre 14, 2000 sa dili pa ang actual nga selebrasyon sa Aprill 27, 2021.
Gipahibawo ni Lapu-Lapu City Mayor Junard Chan nga ang dungan nga selebrasyon mopadangat og tag-singko minutos nga speech si Domagoso didto kaulohan sa dapit diin adunay monumento si Datu Lapu-Lapu, sundan sa dakbayan sa Lapu-Lapu ug Davao City pinaagi ni Mayor Sarah Duterte.
Inisyal nga plano, si Presidente Rodrigo Duterte maoy mohatag sa katapusang pakigpulong nga manukad sa Lapu-Lapu City.
Gipaabot nga adunay kausaban sa bag-uhay lang giayo nga Liberty Shrine ang dapit diin nahitabo ang makasaysayanong panag-away ni Lapu-Lapu tali sa Portuguese explorers nga gipangulohan ni Ferdinand Magellan.
Una mao ang pag-ilis sa naandang estatuwa ni Datu Lapu-Lapu ngadto sa gibana-bana nga 60-foot statue nga magbuntaog sa himuong mini-island sa mangrove area sa maong baybayon.
Ang maong higanteng estatuwa mag-atubang na sa park ug adunay bahin sa maong dapit nga butangan og “dancing fountain” ug ubang areas butangan og landscape aron aduna gihapoy greenery ang lugar.
Giingong moabot sa P100 milyones ang gitagana sa maong proyekto nga kuhaon sa contingency fund ni Presidente Duterte.
Niadtong Enero 30, 2019 atol sa pamunoan ni Radaza gihimo ang P50 milyones nga renovation project aron mapalapdan ang area pinaagi sa pagpatag sa maong site. (FVQ)