HUMAN mabalhin ang tanang tindera ngadto sa bag-o nga merkado sa dakbayan sa Mandaue, adunay 46 ka mga pamilya ang mipuli og tukod sa karaang merkado nga naghimo og mga barongbarong.
Ang karaang merkado nahiluna sa luyo sa Mandaue City Cultural and Sports Complex.
Nasayran sa Mandaue City Housing and Urban Development Office (Hudo) ang 46 ka pamilya nga nagtukod og barongbarong nga gama lang sa light materials.
Sigon ni Cesar Ylanan, ang Dision Head sa Demolition sa Hudo, nga nakahibaw sila nga adunay informal settlers sa maong luna human makadawat og taho gikan ni Barangay Captain Ian Cortes sa Barangay Centro kabahin sa pagpamuyo sa illegal settlers sa dapit.
Atol sa ilang pag-inspeksyon, nakaila si Ylanan sa mga informal settlers og sigon niya nga sila kini ang ilang mga gipangdemolish atol sa clearing operation sa Gaisano St. ug Zuelig St.
“Magdakop dakop gyud mi mao gyud na kada human namog demolish mubalhin naman sa lain,” sigon ni Ylanan.
Dugang niya nga kining mga informal settlers nakadawat na og mga tabang pinansyal sa dakbayan sa Mandaue, P10,000 kung kini wala malabot sa criteria sa Republic Act 7279, apan kung malabot kini nakadawat na kini of P21,000.
Mihatag na og 7-day notice ang Hudo ngadto sa mga pamilya nga mubiya sa maong lugar sa dili pa ang Oktubre 21 ning tuiga.
Kining mga informal settlers dili mga lumad nga taga Mandaue, ang niini taga Tabogon, Naga, Moalboal ug Consolacion. (KFD)