ARON maprotektahan ug mapreserba ang kultura sa mga Indigenous Peoples (IP) o lumad, nibisita ang National Commission for Culture and the Arts (NCCA) sa siyudad sa Davao kauban ang Submission on Cultural Communities and Traditional Arts (SCCTA) subay sa IP month, Dayaw Suroy Media Caravan, Oktubre 15 ning tuig.
Ang media caravan gihimo sa Philippine Information Agency na gipangunahan sa cluster representatives nga sila Lordan Roxas gikan sa Casiguran Community, Melanie Joy M. Seville gikan sa Bagobo/Kalagan/Tagakaolo Community ug Eduardo Delfin gikan sa Itbayat Community aron hisgutan ang mga kalihukan sa National IP Culmination Month.
Apil sa gihisgutan mao ang "rights and rituals" sa pagsul-ob sa tradisyunal nilang suot nga nahimong kontrobersyal sa nakalabay nga Kadayawan 2019.
"Bahin aning cultural appropriation nga gi-istoryahan sa mga tao, mura na siyag neo-ethnic tungod kay ginasagol-sagol nila ang mga tela sa klase-klaseng komunidad sa IP," ingon ni Seville.
Tema sa kalihukan ang "Vital Wisdoms: Learning with the indigenous peoples" (Buhay na Dunong: Pagkiatuto kasama ang mga katutubo).
Matod ni NCCA Commissioner Alphonsus Teroso, importante nga magkahiusa ang tanang komunidad alang sa selebrasyon.
"Pinaagi sa selebrasyon sa IP month, gihatagan og importansya sa gobyerno ang presensya, pag-apil ug paghatag og oras sa IP, labi na sa paglambo sa nasod," suma ni Commissioner Tesoro.
Kabahin sab sa programa ang pag-organisa sa national Kalkali o panagsinultihanay o "conversations."
Himuon sab kini sa Maryhill School of Theology, Quezon City karong Oktubre 28-29, 2019.
"Adunay walo ka mga session aron kami magbahagi mahitungod sa pagpreserba sa kulturang Pilipino," ingon ni Roxas.
Ang umaabot nga aktibidad gisalmutan sa gibana-banaang 200 ka delegado gikan sa lahi-lahing miyembro sa komunidad sa IP kauban ang pipila ka speakers nga mohatag sa ilang panlantaw ug kasinatian mahitungod sa Intangible Cultural Heritage sa Pilipinas. (Allan Acera Jr., Claire Yvonne Aznar ug Maria Corena Binan, AdDU Interns)