MALALAG, Davao del Sur -- Mokabat sa P2.5 milyones ang damyos sa nasunog nga pribadong gambalay sud sa compound sa merkado publiko atol sa selebrasyon sa kapistahan sa patron ning lungsod, Martes, Oktubre 15.
Gitataw ni Police Captain Edilberto Cabillo, hepe sa Malalag Municipal Police Station, nga banda alas 11:10 sa buntag dihang kalit miulbo ang kalayo.
Matud ni Cabillo nga sa taho gikan sa Bureau of Fire Protection (BFP), gikabutyag nga gipanag-iyahan ni Norma Ramos ang maong gambalay apan girentahan ni Nic Emmanuel ug gihimoan og mga stall nga gi-arkilahan sa mga negusyante og botika, bakery, meat shop, cable ug mga feeds.
Si Cabillo naghulagway nga sa tunga sa building adunay bakery nga nag-renta sa karaang puwesto diin gituohan nga nagsugod ang kalayo.
Apil nga nasunog ang usa nakaparadang Toyota Vios nga anaa atubangan sa botika.
Gilayong niresponde ang kabomberohan gikan sa mga silingang kalungsuran sa Sulop, Padada, ug Digos City sa Davao del Sur ug Sta. Maria sa Davao Occidental.
Gidason ni Cabillo nga hingpit nagpakgang ang kalayo alas 11:45 sa buntag.
Apan di pa masulti sa kapulisan ug BFP kung unsa ang hinungdan sa sunog samtang nagpadayon ang imbestigasyon.
Nahitabo ang kalamidad samtang nagkapuliki ang mga parokyano sa pagsaulog sa ilang ika-60 kapistahan sa patron nga St. Teresa de Avila. (Orlando B. Dinoy)