Trak nalimbuwad; butane canisters nagpasad

GIDALI: Kabomberohan, traffic enforcers ug disaster management officers sa Dakbayan sa Talisay daling miresponde sa pagkalimbuwad ning pick-up truck sa South Coastal Road tungod sa mga karga niining butane canisters nga kuyaw nga moulbo. (Tampo sa Talisay City Disaster Risk Reduction Management Office)
GIDALI: Kabomberohan, traffic enforcers ug disaster management officers sa Dakbayan sa Talisay daling miresponde sa pagkalimbuwad ning pick-up truck sa South Coastal Road tungod sa mga karga niining butane canisters nga kuyaw nga moulbo. (Tampo sa Talisay City Disaster Risk Reduction Management Office)

GRABENG paghuot sa trapiko sa Cebu South Coastal Road (CSCR) ang nasinati sa mga motorista pasado alas 4 Miyerkules sa hapon, Oktubre 16.

KIni tungod sa disgrasya nga naglambigit sa usa ka fuel tanker ug pick-up truck nga nagdala og butane canisters sa CSCR sa Barangay Cansojong, Dakbayan sa Talisay.

Sa inisyal nga pakisusi sa Talisay City Police Station, matud ni Police Patrolman Jason Pinat nga parehong nagpadulong sa Dakbayan sa Sugbo ang duha ka mga sakyanan.

Ang tanker gimaneho ni Arman Tanjaro samtang nagsunod ang pick-up truck nga gimaneho ni Mario Cuizon, diin karga ang libuan ka mga butane canister.

Matod ni Tanjaro nga sa dihang nagsubay na siya sa dan nga pasaka, giingon nga kalit nigahi ang manobela sa iyang sakyanan.

Aron di makadisgrasya sa uban, iyang gisaka ang gimaneho nga tanker ngadto sa center island.

Samtang si Cuizon, kinsa nagmaneho sa pick-up truck nakugang, wa kaandam sa kakalit sa hitabo.

Aron di usab grabeng kadaut ang mahitabo, iyang gibangga ang sakyanan ngadto sa kahoy nga anaa sa center island.

Tungod sa impact, natumba ang sakyanan nga gimaneho ni Cuizon ug nagpasad ang mga butane canisters diha sa dan.

Daling ni-responde ug ni- secure sa lugar ang kapulisan, traffic enforcer, kabumberuhan sa Talisay ug Talisay City Disaster Risk Reduction and Management Office.

Ilabi na nga giingong adunay ni-leak sa ubang canisters.

Parehong anaa sa luwas nga kahimtang ang mga drayber sa duha ka mga sakyanan. (FMD)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph