GISUGDAN na og hawan sa Cebu City Government ang V. Rama Avenue gikan sa mga illegal structure ug basura nga nagpatong sa sidewalk.
Di mominos 50 ka mga personnel gikan sa Prevention Restoration Order Beautification Enhancement, Cebu City Transportation Office, City Environment and Natural Resources Office, Department of Public Services ug Engineering Department, Department of Public Works and Highways, Cebu City Police Office ug volunteers ang nagtinabangay sa paglimpyo.
Si Konsehal Renato Osmena Jr., kinsa maoy nag-supervise sa clearing operation, nagkanayon nga kini maoy pagpadayon sa Siyudad ubos sa liderato ni Mayor Edgardo Labella, pagsunod sa direktiba ni Presidente Rodrigo Duterte nga gipaagi sa Department of the Interior and Local Government (DILG).
Ang team nagsugod sa eskina sa N. Bacalso paingon sa eskina B. Rodriguez.
Ang wala mahuman nga parte sa V. Rama ilang ipadayon karon ug sa mosunod nga mga adlaw hangtod sila moabot sa Barangay Guadalupe.
Si Osmeña nagkanayon nga himuon nilang pilot area ang V. Rama sanglit nalimpyo na ang Colon ug Osmeña boulevard.
Ilang isunod ang mga dalan nga aduna pay daghang obstruction. (PAC)