2 Milyon ka mga trabaho naghuwat: Labella

DOS milyones ka trabaho ang mapaabot sa mga lumolupyo sa Dakbayan sa Sugbo sa mosunod nga 20 ka tuig inig hunat sa kalambuan sa 26 ektaryas nga yuta sa South Road Properties (SRP) nga tabangan pag-ugmad sa Ayala Land Inc. ug SM Prime Holdings Inc.

Kini ang gipahibawo ni Mayor Edgardo Labella atol sa iyang pagsugilon sa iyang unang 100 ka adlaw pagdumala sa Dakbayan uban sa iyang pagkwentada sa iyang mga nahimo.

Ang mayor nagkanayon nga ang trabaho, direct ug indirect, maoy resulta sa feasibility study nga gidumala sa consortium sa Ayala ug SM sa ilang pagtukod og tag-as nga mga edepisyo.

Si Labella nagkanayon nga ang direct jobs masudlan sa mga aplikante sulod sa gitukod nga edepisyo samtang kadtong indirect jobs, mao kadtong mga trabaho nga namugna bunga sa pagtukod sa mga estruktura sama sa taxi drivers, security guards ug ubang matang sa service providers.

Base sa proposal nga gitunol ngadto sa buhatan ni Labella, sulod sa 20 ka tuig, ang buhian nga puhonan para sa patigayon moabot og kapin P300 bilyones.

Nabuhat

Samtang, ang presentasyon ni Labella sa iyang unang 100 ka adlaw nakasentro sa 10 ka kausaban, ang uban iya nang nahimo ug ang uban iya pang himuon sa iyang unang termino.

Una, pagpalimpyo ug pagpahapsay sa dakbayan.

Gawas sa tinguha nga maayong koleksyon sa basura, gibandilyo usab sa mayor ang iyang tinguha nga pagtanom og 3 milyones ka punoang kahoy sulod sa tulo ka tuig, diin 25,000 na ang ilang natanom.

Ikaduha mao ang business friendly city.

Gipasigarbo sa mayor nga dali nalang mosulot ang mga business ug building permit gumikan sa maayo nga trabaho sa Office of the Building Official (OBO) pinangulohan ni Florante Catalan, usa ka arkitekto.

Gipahibawo usab niya nga aduna nay financial center ang Dakbayan diin tanang transactions labot sa pagkolekta og kwarta sa Dakbayan adto ipahigayon nga naa sa bag-ong building duol sa Senior Citizens Park.

Matag tuig, ang Siyudad makakolekta og binilyon nga salapi gikan sa buhis sa katawhan. Ang Siyudad nigahin na og P250 milyones para sa pag-moderno sa traffic light system sa Siyudad isip hulip sa tulo na ka dekada nga teknolohiya.

Gipasalamatan usab ni Labella si Secretary Michael Dino, kinsa maoy nangusog para matukod ang Integrated Intermodal Transport System nga langkuban sa Monorail Transit, Bus Rapid Transit ug cable car nga maoy gipanglantawan sa mayor nga makasulbad sa problema sa trapik sa Sugbo.

Kini uban sa abag nila ni Mayor Jonas Cortes sa Mandaue ug Mayor Gerald Anthony Gullas Jr. sa Talisay.

Ang development sa South Road Properties diin ang SM ug Ayala, Filinvest ug umaabot pang mga developer mobubo sa ilang binilyon nga puhonan para pagpalambo sa 300 ektaryas nga propiedad.

CCMC

Sa unang kwarter sa 2020, ang unang tulo ka andana sa Cebu City Medical Center (CCMC) mahimo nang magamit ug libre nga makapatambal ang mga kabos nga mga lumolupyo sa siyudad.

Ang mayor gusto usab nga gahinan og pundo para sa maayong nutrisyon ang dul-an 200,000 ka mga tinun-an sa kindergarten ug elementary ug pagtukod og dugang mga tunghaan ug sports facility.

Ang quick response sa matag trahedya ug modernohonon ang kagamitan uban sa iyang paghatag og kasigurohan sa public order and safety para sa kaayohan sa katawhan sa dakbayan.

Gusto usab niya nga mapatuman na ang modernisasyon sa Carbon public market ug ipabilin ang local nga kultura.

Katapusan mao ang pagtukod sa mga medium rise building alang sa libuan ka mga pamilya nga way balay.

Related Stories

No stories found.
SunStar Publishing Inc.
www.sunstar.com.ph