SUPERBALITA CEBU

Kinilong shabu ihatod

(SunStar Photo/Benjie B. Talisic)

KANHI waiter sa usa ka restaurant ug kanhi varsity player sa basketball sa usa ka unibersidad sa Sugbo nakuhaan og 1.7 kilo nga shabu sa buy-bust sa City Drug Enforcement Unit sa Cebu City Police Office (CCPO) sa Huwebes sa kaadlawon, Oktubre 16, 2019.

Uban sa buy-bust sa CDEU ang City Intelligence Branch (PIB) ug Police Drug Enforcement Group Visayas.

Si P/Lt. Col. Frankie Jingle Lugo, bag-ong natudlo nga labaw sa CDEU maoy nangu sa operasyon batok kang Mark Jovan Rosales, alyas Jovan, 29, taga dan A.Lopez, Barangay Labangon, Siyudad sa Sugbo.

Lakip usab nga nadakpan sa operasyon si Malou Dela Peña, 41, lumolupyo sa dan A. Lopez, Barangay Calamba ning siyudad, apan lumad nga taga lungsod sa Nabunturan, Compostela Valley Province.

Matod pa ni Lugo nga ang ilang target mao si Rosales.

Sa paghasmag na nila, ilang naabtan si Dela Peña nga kauban ni Rosales ug nasuta nga mipalit diay og shabu.

Nasakmit gikan kang Rosales ang 1.7 kilo nga shabu nga mobalor og P11.5 milyones base sa Dangerous Drugs Board (DDB) value.

Si Rosales gipalitan og 25 gramos nga shabu sa nagpailang poseur buyer sa kantidad nga P36,000 gamit ang boodle money.

Samtang si Dela Peña nakuhaan sa iyang bulsa og meduim nga pakete sa shabu dihang gikapkapan sa babayeng pulis.

Dugang pa ni Lugo sa pakighinabi sa Superbalita Cebu nga halos duha ka buwan ang ilang pagpaniid kang Rosales hangtud na sa pagkasamit nila sa ubay-ubay nga bulto sa shabu.

Gihulagway usab sa kapulisan nga makonsiderar nga high value target si Rosales base sa nasakmit nga ebidensiya.

Subayon sa kapulisan kinsa ang babaye nga nag-supply kang Rosales.

Si Rosales graduwado sa kursong Nautical. Human nigradwar, nanarbaho siya isip waiter sa usa ka restaurant hangtod nawad-an siya og trabaho.

Matod ni Rosales nga nalambigit siya sa ilegal nga kalihukan dihang ang iyang hinigugma ni-supply kaniya og shabu.

Niangkon usab si Rosales nga mao kini ang ikatulong higayon nga siya gihatdan og tag usa ka kilo nga shabu.

Si Rosales mangunay sa paghatod sa mga order nga mag-agad ra sa tawag sa iyang kasabot.

“Siya ra man ang mokontak sa akoa, Sir, kay mag-ilis-ilis man na siya og cellphone number,”butyag ni Rosales.

Tag P2,000 matag 50 gramos nga shabu ang iyang bahin.

Moabot og P40,000 ang iyang makwarta kon tapukon tanan ang iyang kita.

Kasong kalapasan sa Comprehensive Dangerous Drugs Act of 2002 ang iyang atubangong kaso.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph