DUL-AN tunga sa milyon ang nakuha ug gibitbit pa sa mga tulisan ang closed-circuit television (CCTV) camera dihang gitulis ang Quality Appliance Plaza sa J.R. Borja, Aguinaldo Street, Siyudad sa Cagayan de Oro.
Anaa sa P359, 756.00 ang kantidad nga nadala sa mga tulisan samtang gikuha usab ang mga butang sa mga empleyado sama sa cellular phone, alahas, kwarta ug uban pa.
Sa impormasiyon giingong mga alas 7:00 sa gabii nadawat sa kapulisan ang taho nga upat ka mga wala mailang lalaki ang nitulis sa maong establisyemento. Tulo ang naka-face mask samtang usa ang nagsul-ob og helmet.
Gibutyag ni Police Master Sergeant Ruben Gallur, imbestigador sa Police Station 2 (PS2) sa Cogon nga armado ang mga tulisan samtang ang guwardiya sa establisyemento nga si Jose Braquez ubos sa Delpians Security Agency walay isyung armas.
"Ang security nagtaud sa iyang sapatos kay mo duty panggabii, mao nay wala nila nakita kay gipahapa sila tanan kay gihadlok nga naay granada sa pultahan," matud ni Gallur.
Walay naangol sa mga biktima gawas sa giingong gitumban human nga ni-aksiyon og tindog.
Usa sa mga anggulo usab nga gitan-aw sa kapulisan mao ang inside job.
"Wala pa mi lead pero ang tanan nga nabilin didto sa maong establishment during sa maong pagpanulis, subject for background investigation basig naay mga connection outside ani or connivance or inside job," dugang pa.
Anaa na sa kapulisan ng mga cellular phone usab sa mga empleyado aron ma imbestigahan.
Gidugang pa usab nga hanas na ang maong mga tulisan ilabi na nga gidala pa ang CCTV recorder aron walay mabiling ebidensiya.
"So far sa result sa ilang pagpanulis murag hanas na ni sila, naa sa mga 10 minutes dili molampas og 20 minutes sab," dugang pa.
Giingong posibleng planado ang maong krimen tungod kay kabalo kini kon kanus-a ang kwarta mosulod ug kanus-a masirado na.
Ang mga suspetsado anaa na sa hingkod ang pangidaron ug ang pinulongan niini giingong tagalog.