PIPILA ka mga pork products ang gi-hold sa Task Force African Swine Fever (ASF) nga gikan sa Taytay, Rizal nga gideklarang positibo sa ASF.
Gikumpirmar ni Dr. Benjamin Resma, ang pangulo sa Provincial Veterinary Office, nga nasapon ang mga pork product sa Macasandig, Siyudad sa Cagayan de Oro nga gikan sa Taytay, Rizal.
Gibutyag sab niini nga moabot ngadto sa 250 ka mga packs sa pork siomai, 17 kilos sa chorizo, longganisa ug uban pa ang nasakmit.
Matud ni Resma nga mabinantayon kaayo karon ang probinsya ug siyudad nga dili masudlan sa produkto gikan sa Luzon o bisan sa mga lugar nga notadong adunay presensya sa ASF tungod kay ikamatay gyod kini sa mga binuhing baboy dinhi sa lalawigan.
Hinuon sukad nga gimando ni Misamis Oriental Governor Bambi Emano nga i-ban ang mga produkto gikan sa Luzon, walay mga natalang namatay nga baboy ug kon aduna man, kini tungod sa normal nga mga sakit sa baboy.
Matud ni Resma nga iyang gihangyo ang katawhan ug gipanawagan nga kon moadto sa kaulohan dili magpadala og pasalubong nga pork products.
Subling giklaro niini nga ang ASF dili makatakod sa tao apan ngadto lamang sa baboy.
Aron sab pagpamatoud nga luwas ang mga produktong baboy sa Northern Mindanao, ang mga grupo sa hog raiser sa lalawigan magpakaon og 25 ka litson baboy sa mga sakop sa media lakip empleyado sa Kapitolyo kon asa aduna sab humbaon samtang ang laman loob himoung halang-halangon sa Biyernes, Oktubre 18, 2019.