HUMAN sa kalisang sa katawhan sa pagtay-og sa 6.3 magnitude nga linog didto sa Tulunan, North Cotabato ug nasinati sa kinatibuk-ang Davao Region, Miyerkules sa gabii, Oktubre 16, makalingaw karon ang post sa netizens diha sa social media.
Migula dayon ang giingong fake news kay lagi daw mihubas ang tubig sa dagat sa Toril area ug sa Times Beach, hinungdan nga nag-panic ang mga tawo, nanagan dayon sa taas nga bahin ning dakbayan didto sa Shrine Hills sa Matina ug sa Hilltop sa Barangay Langub.
Usa pa lang ka oras human sa linog, nanggula dayon ang mga pasiaw sa mga post sa Facebook, una na niini mao ang “Nagkagubot sa Aplaya kay naay nisiyagit og ‘tsunami, tsunami’. Sa dihang ang inahan diay sa bata nangita sa iyang anak nga si Chona Mae.”
Naa sab mga posts nga wala na sila nalisang kay ang ilang silingan tupad sa ilang kuwarto, magsige og uyog labi na sa tungang gabii ug kaadlawon, diay kuno, nag-jerjer.
Diha sab post nga mi-share og daghan diin iyang giingon, “Nagkita na nuon mi sa akong nautangan, kay nagdungan mi’g bakwit, maayo nalang nilinog, wala gyod siya kapaningil nako.”
Luyo sa kalisang sa linog, wala gyud nagpaulahi ang katawhan nga makigsandurot sa kahimtang diha sa social media. Gani sa social media sab nabiktima ang kadaghanan diha sa giingong dunay moabot nga tsunami.
Hinuon makatabang gayod ang social media diha sa pagpasayod sa impormasyon, apan unta diha kita motuo sa balido ug kasaligan.
Ang atong pagpakigsayod maoy makaluwas kanato, busa kung dunay mga earthquake drill, seryusohon nato ang pag-apil niini, ug sa mga seminar sab, di mag-sige’g tuslok sa cellphone ug dili matulog, kinahanglan maminaw aron maayo ug husto gayod ang atong pagpaambit niini sa uban.
Hahay, balik ta ni Chona Mae, nakauli na ba ka ha kini? Nalisang baya ang inahan niini, kay paglinog, siyagit dayon siya sa pangalan sa iyang anak. Hahahaha.
Mao nang Chona Mae, ayaw gyod og laag-laag lagi ba, daghan ang mapurwesyo nimo, daghan ang gipamaulan, sayonan ka’g nangalsa og mga gamit kay gipangkarga sa traysikol padung sa Shrine Hills ug Hilltop.
Hinuon walay mga natala nga namatay sa Davao City, apan anaa sa Digos City kinsa nahugmakan og gahi nga butang, apan dunay mga establisemento nga nangaguba
Amping kita mga higala, biya-i nang mga butang kung matigayon ang ‘The Big One’ unang luwason ang miyembro sa pamilya, gilayong mobakwit labi na og dunay kasaligan ug balido nga impormasyon.
Hangtud sa sunod Biyernes mga higala, amping kamo ug ayaw kalimot sa pagpasalamat sa atong Labaw’ng Makagagahom sa grasya ug sa maayong panglawas nga atong nasinati ning mga taknaa.