KIDAPAWAN CITY -- Nakamugna og kalisang sa katawhan ang patay-og sa linog alas 7:37 sa gabii niadtong Miyerkules, Oktubre 16, sa probinsiya sa North Cotabato.
Ang magnitude 6.3 nga linog niresulta sa pagkakalas sa duha ka mga tawo nga mao si Tony Panangulon, taga Barangay Gaunan, M’lang human giatake sa sakit sa kasingkasing ug ang syete-anyos nga nahulogan og semento sa pader sulod sa North Cotabato District Hospital sa Tulunan apan molupyo sa Datu Paglas.
Samtang laing upat ka mga tawo ang naangol human makaangkon og ginagmay nga mga samad atol sa linog.
Duna say mga balay nga naguba, mga buhatan sa gobyerno, mga nangahulog nga displey sa tindahan ug mga kabtangan sulod sa mga pinuy-anan ug uban pa.
Gisuspende sab ni acting Governor Emmylou “Lala” Mendoza ang tanang libel sa klase Huwebes, Oktubre 17, aron mopahigayon og pagsusi ang lokal nga kagamhanan sa mga damyos sa linog apan iyang giklaro nga dunay trabaho sa buhatan sa gobyerno.
Hangtud Huwebes, nakasinati pa gihapon og mga aftershocks sa 6.3 magnitude nga linog nga sentrong nahitabo sa Tulunan. (Edgar E. Fuerzas)