DAVAO DEL SUR -- Usa ka singko anyos nga babaye, inahan ug iyang siyam ka bulan nga anak lalaki nga taga Magsaysay sa nahisgutang probinsiya gikompirma nga namatay human sa magnitude 6.3 nga linog nga nitay-og niadtong Miyerkules sa gabii, Oktubre 16.
Gikanayon ni Magsaysay information officer Anthony Allada nga ang batang babaye nga namatay nailang si Christine Roda kon diin giingong tua sa ilang kusina sa dihang nahugno ug nabunal ang ulo tungod sa pagtay-og.
Daling gidala ang biktima sa nirespondeng ambulansiya sa lokal nga kagamhanan ngadto sa ospital sa lungsod sa Bansalan apan gibalibaran hinungdan nga daling gibiyahe padulong sa Gonzales Hospital sa Digos City kon diin giingong gideklara siyang dead on arrival.
Gibutyag sab ni Allada nga usa ka pamilya nga kon diin dunay lima ka miyembro gikan sa hilit ug bukiron nga bahin sa Purok 6, Barangay Malawanit sa Magsaysay nalubong sa landslide pipila ka minutos human sa linog.
Ang amahan ug duha niya ka mga batan-ong anak lalaki naluwas apan ang inahan ug ang iyang masuso nga maoy katapusang naugkat ang namatay.
Gihulagway nga gigakos pa sa inahan ang iyang anak sa dihang nakubkuban sa mga rescue team.
Ang amahan kinsa giila nga si Joyjoy Lakay ug iyang duha ka mga anak gidala ngadto sa National Hospital sa Digos City.
Ang linog nga dunay magnitude 6.3 nahitabo alas 7:37 sa gabii niadtong Miyerkules kon diin ang epicenter niini nahimutang mga 22 kilometros gikan sa habagatang sidlakan sa Tulunan, North Cotabato nga tectonic ang origin, segun sa Philippine Institute of Volcanology and Seismology (Phivolcs).
Gawas sa nakalas nga kinabuhi, niabot sab og 25 ka mga tawo ang naangol samtang nihatud sab kini og daghang damyos sa mga imprastraktura ug pagkalisang sa daghang molupyo sa probinsiya.
Daghan sa mga naangol gihatud sa Davao del Sur Provincial Hospital apan gibalhin dayon sa Southern Philippine Medical Center (SPMC) sa Davao City, human nasamdan sa mga nahugmak nga kabalayan.
Samtang dugang ni Allada nga nahugmak ang ilang munisipyo ug maayong pagkaguba sa Kia Bongo nga sakyanan nga anaa nakaparada sa kilid niini ug silong nga parte sa maong gambalay.
Ubay-ubay sab ka mga balay ang nangaguba sa nagkadaiyang barangay apan mihimo pa sila og damage assessment.
Subayon sab sa Municipal Disaster Risk Reduction and Management Council ang Dona Salud High School human pipila ka mga lawak ang nadamyos.
Sa lungsod sa Bansalan nga nakasinati sab sa kusog nga linog, temporaryong gisirad-an ang public mall human nakita sa lokal nga gobyerno ang daghang liki sa gambalay.
Sa Barangay Darapuay sa maong lungsod gihapon, anaa na sa kalsada mihigda ang mga tawo human gibati og kakulba tungod sa nagpadayong aftershocks.
Nakasinati sab og pagdahili sa yuta didto sa Sitio Bagong Silang sa Barangay Managa.
Sa dakbayan sa Digos, nadamyos sab ang ubang estruktura sa Cor Jesu College ug nahug ang mga television set sa ubang lawak.
Suspendido na ang klase sa mga pribado ug publikong tunghaan sa probinsiya, apil ang mga transaksiyon sa mga lokal nga gobyerno.
Padayon nga nakasinati og mga aftershocks ang probinsiya ilabi na nga laing linog ang nahitabo sa lungsod sa Tulunan, alas 8:09 sa gabii, natala kini sa magnitude 5.5 ug anaa sa 21 kilometros sa habagatang sidlakan.
Natala sab ang magnitude 4.0 nga linog sa Columbio, Sultan Kudarat, alas 8:34 sa gabii ug nasundan sa magnitude 4.3 alas 9:25 sa gabii.
Samtang, alas 4:53 sa buntag kagahapon, Oktubre 17, natala sa PhilVocs ang magnitude 5.3 nga linog, mga 17 kilometros gikan sa amihanang sidlakan didto sa Manay, Davao Oriental.
Giabisohan sa mga disaster officer ang publiko nga di mag-panic apan kanunay’ng mag-igmat tungod kay molungtad pa hangtud sunod semana ang mga masinating aftershocks. (Uban sa taho PIA-Davao Region ug Magsaysay-LGU)