LAING professional boxer ang namatay, pipila ka adlaw nga na-coma human ma-knockout sa iyang away.
Si Patrick Day, 27, nahunosan gyud sa iyang kinabuhi human kini makaangkon og traumatic brain injury atol sa iyang away batok ni Charles Conwell niadtong Sabado sa gabii didto sa Chicago.
Pila ka oras gikan sa iyang pagka-knockout sa ikanapulo nga round sa ilang USBA super welterwegiht title fight, si Day gidala gilayon sa Northwestern Memorial Hospital ug gioperahan. Na-coma ug wala na gyud maka-recover.
Ang iyang promoter nga si Lou DiBella, sa iyang giluwatan nga pamahayag kagahapon, mibutyag nga si Day giliyukan sa iyang kabanay, kahigalaan ug mga sakop sa boxing team.
“Patrick Day didn’t need to box. He came from a good family, he was smart, educated, had good values and had other avenues available to him to earn a living. He chose to box, knowing the inherent risks that every fighter faces when he or she walks into a boxing ring. Boxing is what Pat loved to do. It’s how he inspired people and it was something that made him feel alive.”
Matod pa sa taho nga si Day natumba sa ikaupat ug ikawalo ka round sa wala pa kini ma-knocked out sa 10th round human maigo sa left hook.
Dugang sa taho nga nakuyapan kini samtang gihatod kini paingon sa ospital.
Lumad nga taga Freeport, New York, si Day, isip professional boxer naghupot og 17-4-1 nga record nga may unom ka knockous.
Niadtong 2012, siya midaog sa New York Golden Gloves ug pagsunod tuig misulod sa pagka professional boxer. (JBM)