HUMAN makalangkat og gold medal sa world championship didto sa Russia, sunod targeton sa Filipina boxer nga si Nesthy Petecio mao na usab ang 30th Asian Games ug ang qualifying round alang sa 2020 Tokyo Olympics.
Si Petecio miabot sa Manila niadtong Martes sa hapon nga lab-as pa sa iyang kalampusan sa 2019 AIBA Women’s Boxing World Championship featherweight division didto sa Russia niadtong Dominggo.
Atubangan sa media atol sa press conference sa Century Park Hotel uban sa laing gold medalist sa gymnast nga si Carlos Yulo, ang 27-anyos nga babayeng boksidor miyagyag sa sunod niyang mga lakang.
Gawas ni Yulo kinsa nakakulit sa makasaysayanong gold medal sa 41st FIG Artistic Gymnastics World Championships sa Hans Schleyer Halle sa Stuttgart, Germany diha usab ang pole baulter nga si EJ Obiena, ang unang Pinoy athlete nga nakasulod sa 2020 Olympics.
“Sa SEA Games po handa na po akong sungkitin ang ginto,” matod ni Petecio, kinsa gikatakdang makadawat og P1 million nga insentibo gikan sa Philippine Sports Commission.
Ang lumad nga taga Davao uban sa national boxing team ang mobiyahi paingon sa Queensland, Australia alang sa ilang trainig isip preparasyon sa SEA Games nga sugdan sa Nobiyembre 30.
Pero anugon ang gold medal ni Petecio sa World Championship sanglit dili kini maka-qualify kaniya alang sa Olympics.
“‘Yun nga po nakakaiingit po kasi dapat nga itong world namin qualifying na din po ito pero biglang nagbago po yung sa AIBA rules po,” padayag ni Petecio nga napatik sa sports.abs-cbn.com.
Kini dakong sukwahi sa nahimo nila ni Yulo ug Obiena kansang mga kadaugan naghatag kanila og ticket sa Olympics sunod tuig.
Si Petecio mosalmot sa Asian Olympic qualifying tournament sa China sunod tuig. (JBM)